राजन रावत
हुम्ला, कात्तिक २७ गते । सिमकोटबाट नेपालगन्जका लागि उडान भर्ने क्रममा जहाजमा प्राविधिक समस्या आएपछि नेपाल एयरलाइन्सको ट्वीनिटर जहाज सिमकोट विमानस्थल मै रोकिएको छ । अचानक जहाजको बायाँ इन्जिनमा खराबी आउँदा जहाज सिमकोट विमानस्थल मै रोकिनु परेको हो ।
नेपालगन्जका लागि चौध जना यात्रुहरू भरेर एउटा इन्जिनिन सञ्चालन गरेर अर्को इन्जिन सञ्चालन गर्दा उक्त इन्जिन सञ्चालन नभएपछि जहाजमा प्राविधिक समस्या आएको नेपाल एयरलाइन्स सिमकोट स्टेसनका प्रमुख बलराज हमालले बताउनुभयो । नाइन एन एबियु कलसाईनको ट्वीनिटर जहाज नेपालगन्जबाट सिमकोटका लागि सोमबार बिहान चौध जना यात्रु बोकेर सिमकोट विमान स्थलमा अवतरण गरेको थियो । उहाँले यात्रु सबै विमानभित्र पसेको र पाइलटहरूले विमान सञ्चालन गर्ने क्रममा इन्जिन सञ्चालनमा नआउँदा समस्या देखिएको बताउनुभयो ।
उक्त इन्जिनको तल पट्टीबाट समेत इन्धन चुहिएको थियो । पटक पटक चालक दलका सदस्यहरूले इन्जिन सञ्चालन गर्ने प्रयास गर्दा नभएपछि यात्रुहरूलाई झारिएको थियो । जहाजमा प्राविधिक समस्या आएपछि वरिष्ठ क्याप्टेन मनिस बिष्ट, कोपाईलट र एयरहोस्टेज समेत सिमकोटमा बस्नु हुनेछ । नेपाल एयरलाइन्स नेपालगन्जका सहायक बलबहादुर सुनारले मङ्गलबार दुई जना प्राविधिक आएर मर्मत पछि मात्र जहाजका बारेमा भन्न सकिने बताउनुभयो । सोमबार प्राविधिक ल्याउने प्रयास गरिएको भए पनि त्यो सफल हुन सकेको थिएन । झारिएका यात्रुहरूको टिकट भाडा अब फिर्ता गरिनेछ । उक्त जहाजमा एक जना बिरामी महिला समेत हुनुहुन्थ्यो ।
