वीरगञ्ज (पर्सा), कात्तिक २२ गते । वीरगन्ज महानगरपालिकाले सिर्सिया नदी प्रदूषण गर्ने एक उद्योगलाई तीस हजार जरिवाना गरेको छ । प्रदूषित पानी सिर्सिया नदीमा फालेर फोहोरसमेत गरेको भन्दै परवानीपुरस्थित सिद्धि टेक्साइल प्रालिलाई सो जरिवाना गरिएको महानगरपालिकाको सरसफाइ शाखा प्रमुख सर्फुदिन मियाँले जानकारी दिनुभयो ।
यसअघि सिर्सिया नदी प्रदूषणमा मुख्य जिम्मेवार देखिएको भन्दै महानगरपालिकाले पाँच उद्योगलाई पटक-पटक चेतावनी दिँदा पनि प्रदूषण गर्न नछाडेकाले तीन/तीन लाखका दरले जरिवाना गरेको थियो । उद्योगबाट निस्कने रसायनसहितको लेदो तथा फोहोर पानी सोझै नदीमा मिसाउँदा नदी दुर्गन्धित र प्रदूषित भएको थियो ।
महानगरको निरन्तर अनुगमनपछि ग्लोबल लेदर, मारुती पल्स एण्ड पेपर, दुर्गा पल्स एण्ड पेपर र सिद्धी टेक्सटायल्सले भने अझै अटेर गरेको भेटिएको महानगरद्वारा गठित सिर्सिया नदी प्रदूषण नियन्त्रण समितिले जनाएको छ । यसैबिच पर्सा-बारा कोरिडोरका दुई उद्योगले ट्रिटमेन्ट प्लान्ट बनाउन सुरु गरेका छन् ।
महानगरपालिकाले निरन्तर अनुगमन र कारबाही गर्न थालेपछि प्रदूषण नियन्त्रणका लागि निस्कने रसायनयुक्त लेदो तथा फोहोर व्यवस्थापन गर्न उद्योगीहरूले ट्रिटमेन्ट प्लान्ट बनाउन सुरु गरेका हुन् । सिर्सिया नदी प्रदूषणमुक्त बनाउन नदीको आसपासका उद्योगहरू नै मुख्य जिम्मेवार देखिएकाले तत्काल फोहोर पानी सोझै नदीमा मिसाउन बन्द नगरे कारबाहीसँगै उद्योगमा सिलबन्दी गरिने महानगरप्रमुख राजेशमान सिंहले चेतावनी दिएपछि उद्योगीहरू ट्रिटमेन्ट प्लान्ट बनाउन तयार भएका हुन् ।
अहिले मरियम लेदर उद्योग र अरनिको टेक्सटायल्सले अत्याधुनिक ट्रिटमेन्ट प्लान्ट बनाउने काम अघि बढाइसकेको महानगरपालिकाका प्रमुख प्रशासकीय अधिकृत लक्ष्मीप्रसाद पौडेलले जानकारी दिनुभयो । रासस
