गायक भरत लिमेलको ‘तिम्रै मोया छ’ म्युजिक भिडियो सार्वजनिक

खोटाङ, असोज १५ गते । गायक भरत लिमेल मगरको ‘तिम्रै मोया छ’ बोलको गीतमा निर्माण गरिएको म्युजिक भिडियो सार्वजनिक भएको छ । खोटाङको वराहपोखरी गाउँपालिका–१ पिप्लेमा जन्मनुभएका उहाँको उक्त नयाँ गीति सङ्ग्रहमा निर्माण गरिएको म्युजिक भिडियो ओएसआर डिजिटल नेपाल युट्युब च्यानलबाट आइतबार साँझ सार्वजनिक गरिएको हो ।

दिनेश सुवेदीको शब्द तथा करसाङ लामाको सङ्गीत रहेको उक्त गीतमा गायक मगरसँगै चर्चित गायिका अस्मिता अधिकारीको स्वर छ भने गीति म्युजिक भिडियोमा चर्चित नायिका रस्मिला तामाङ तथा जीवन बस्नेत, किरन मगर, राजु श्रेष्ठ, परिश्ना बस्तोला र भर्खरै सम्पन्न ‘खोटाङ प्रतिभा–२०८०’ अन्तर्गत नृत्य विद्याका उपविजेता सुवास विश्वकर्माले अभिनय गर्नुभएको छ ।

अर्जुन खड्काले सम्पादन गर्नुभएको उक्त  म्युजिक भिडियोको निर्देशन राजु श्रेष्ठले र कोरियोग्राफी मनोज तामाङले गर्नुभएको गायक मगरले जानकारी दिनुभयो ।

रावासावा प्राज्ञिक समाज नेपालका महासचिव तथा खोटाङ कलाकार समाज काठमाडौंमा समेत आबद्ध रहनुभएका उहाँको यो सातौँ गीति सङ्ग्रह भएको बताइएको छ । उहाँले यसअघि मायाको आशैमा, भञ्ज्याङ र चौतारी, मनको कुरा, साहरा र तिम्लाई पाउँजस्ता गीति सङ्ग्रह बजारमा ल्याइसक्नुभएको छ । 

जिल्लाको दक्षिणी क्षेत्रमा पर्ने वराहपोखरी गाउँपालिकामा जन्मिएर काठमाडौंलाई कर्मथलो बनाउनुभएका गायक मगर काठमाडौं लिटल ब्लोसम स्कुल नयाँबजार, भक्ति इन्टरनेशनल एकेडेमी बूढानीलकण्ठ र प्रगति बोर्डिङ हाइस्कुल बालाजुमा अध्यापन गर्दै आउनुभएको छ । ‘गाउँदै–पढाउँदै’ गर्नुहुने गायक मगरले लोक–आधुनिक भाकामा निर्माण गर्नुभएको यो म्युजिक भिडियोमा माया÷पिरतीका कुरा गरिएको छ । रासस