राममणि दाहाल
हेटौँडा, असोज २ गते । संविधान दिवस तथा राष्ट्रिय दिवस २०८० को अवसरमा हेटौँडामा भएको दौड प्रतियोगिताको उपाधि नेपाली सेनाले जितेको छ । बागमती प्रदेशको प्रदेश खेलकुद विकास परिषद्ले मङ्गलबार हेटौँडामा आयोजना गरेको दौड प्रतियोगितामा नेपाली सेनाका धावकहरूले उपाधिमाथि वर्चस्व कायम गरेका हुन् ।
पाँच किमी खुला दौड प्रतियोगितामा महिलातर्फ नेपाली सेनाको कालीप्रसाद गणकी वसन्ती गोलेले १९ः१७ मिनेटमा निर्धारित दुरी तय गर्दै प्रथम हुनुभएको परिषद्का सदस्य सचिव सूर्यलाल भण्डारीले जानकारी दिनुभयो ।
दौडमा सेनाको त्रिनेत्र गणकी मनीषा पहरीले २०ः४२ मिनेट र बागमती प्रदेश प्रहरी कार्यालय, हेटौँडाकी जुना थापा क्षेत्रीले २२ः२९ मिनेटमा निर्धारित दुरी तय गर्दै दोस्रो र तेस्रो हुनुभएको छ । यस्तै, पुरुषतर्फको दौडमा सेनाको त्रिनेत्र गणका गणेश कुँवरले १६ः५७ः२५ मिनेटमा, बागमती प्रदेश प्रहरी कार्यालय, हेटौँडाका निर्मल राना मगरले १७ः२६ मिनेटमा र सेनाको गोरखबहादुर गणका यमन कटुवालले १७ः३० मिनेटमा निर्धारित दुरी तय गर्दै क्रमशः प्रथम, द्वितीय र तृतीय स्थान प्राप्त गर्नुभएको छ ।
प्रतियोगिताको बागमती प्रदेशका मुख्यमन्त्री शालिकराम जम्कट्टेलले उद्घाटन गर्नुभएको थियो । प्रतियोगितामा प्रथम, द्वितीय र तृतीय स्थान प्राप्त गर्नेलाई क्रमशः सात हजार, छ हजार र पाँच हजार रुपियाँ नगदसहित प्रमाणपत्र संविधान दिवसका अवसरमा बुधबार हेटौँडामा हुने कार्यक्रममा प्रदान गरिने भएको छ ।
हेटौँडाको बुद्ध चोकबाट सुरु भएर हेटौँडा उपमहानगरपालिका ५ स्थित पिप्ले पुगेर पुनः फर्किएर पाँच किमी दौड खुला दौडमा महिला र पुरुष गरी ७० जना खेलाडी सहभागी थियो।
