चन्द्र पन्दाक
ताप्लेजुङ, भदौ २२ गते । जिल्ला प्रहरी कार्यालय ताप्लेजुङमाथि ढुङ्गामुढा प्रहार भएको छ । नेपाली काँग्रेससम्बद्ध नेपाल तरुण दल, नेपाल विद्यार्थी सङ्घका कार्यकर्ताले जिल्ला प्रहरी कार्यालयमा ढुङ्गामुढा प्रहार गरेको प्रहरीको भनाइ छ ।
नेपाल तरुण दलका जिल्ला सभापतिसमेत रहनुभएका प्रदेशसभा सदस्य खगेनसिंह हाङ्गामको टोली र प्रहरीबीच बिहीबार रातिदेखि सुरु भएको झगडाले उग्ररुप लिएसँगै तरुण दल र नेविसङ्घका कार्यकर्ताले प्रहरी कार्यालयमाथि ढुङ्गामुढा गरेका छन् ।
फुङ्लिङ बजारको पुरानो बैङ्क लाइनस्थित काँग्रेसको पार्टी कार्यालयबाट नाराबाजी गर्दै गएको टोलीले प्रहरी कार्यालयमाथि ढुङ्गामुढा गरेको हो । तरुण दल र नेविसङ्घका कार्यकर्ताले गरेको ढुङ्गामुढाबाट प्रहरी कार्यालयको झ्याल ढोकाका सिसा फुटेका छन् भने अन्य संरचनामा पनि क्षति पुगेको छ ।
काँग्रेस कार्यकर्ताले ढुङ्गामुढा गर्न थालेपछि प्रहरीले आधा दर्जन बढी अश्रुग्यास र हवाई फायर गरेको जनाएको छ । प्रहरीले प्रहार गरेको अश्रुग्यास र हवाई फायरका कारण केही काँग्रेस कार्यकर्ता र सर्वसाधारण घाइते भएको आशङ्का गरिएको छ । घाइते तथा प्रहरी कार्यालयमा भएको क्षतिको यकिन विवरण आउन बाँकी छ ।
अहिले सदरमुकाम फुङ्लिङ अशान्त बनेको छ । प्रहरी, सशस्त्र प्रहरी ठूलो सङ्ख्यामा परिचालित भएको स्थानीय प्रशासनले जनाएको छ । प्रहरीविरुद्ध आन्दोलनमा उत्रेका काँग्रेस कार्यकर्ताहरुले लाठी, मुंग्रीलगायतका घरेलु हतियारसहित चर्को नाराबाजी गरिरहेका छन् । यतिबेला बजारवासी आतङ्कित बनेका छन् भने सदरमुकाम फुङ्लिङमा तनाव कायम भएको स्थानीयको भनाइ छ ।
