एसियाली जुनियर भारोत्तोलन : हेमन्तलाई तीन कांस्य पदक

काठमाडौं, साउन १६ गते । नेपालका हेमन्त पालले एसियाली जुनियर भारोत्तोलन च्याम्पियनसिपमा मंगलबार तीन  कांस्य पदक जित्नुभएको छ । ‘डेब्यु’ अन्तर्राष्ट्रिय प्रतियोगितामै हेमन्तले पुरुष ७३ केजी तौल समूहमा तीन कांस्य पदक जित्नु भएको हो ।

हेमन्तले स्न्याच, क्लिन एन्ड जर्क र कुलमा गरी तीन कांस्य पदक जितेको टिम व्यवस्थापक रामसुन्दर श्रेष्ठले जानकारी दिनुभयो । भारतको नोयदामा जारी प्रतियोगितामा हेमन्तले स्न्याचमा ९७ केजी, क्लिन एन्ड जर्कमा ११० केजी गरी जम्मा २०७ केजी भार वहन गर्नुभयो । 

हेमन्तको स्पर्धामा पाँच राष्ट्रका ६ खेलाडी सहभागी थिए । उज्वेकिस्तानका दुई खेलाडीले प्रतिस्पर्धा गरेका थिए । थाइल्यान्डले स्वर्ण तथा उज्वेकिस्तानले रजत जित्यो । 

प्रतियोगितामा नेपालबाट दुई खेलाडी सहभागी छन् । पुरुष ९६ केजीमा सञ्जय यादवले बुधबार प्रतिस्पर्धा गर्नुहुनेछ । सञ्जयको पनि यो ‘डुब्यु’ अन्तर्राष्ट्रिय प्रतियोगिता हो ।