‘भेलोसिटी पम्प फेस्ट’ साइक्लिङ शनिबार

काठमाडौं, साउन १६ गते । स्विचब्याक नेपाल र हिमाल सिङ्गल ट्रयाकको आयोजनामा शनिबार ‘भेलोसिटी पम्प फेस्ट’ साइक्लिङ हुने भएको छ ।

ललितपुरको बागमती करिडोरस्थित पम्प ट्रयाकमा सञ्चालन हुने प्रतियोगितामा बालबालिका, युवा, जुनियर राइडर, एलिट र मास्टरतर्फ महिला र पुरुष गरी पाँच विधा समावेश गरिएको मंगलबार आयोजित पत्रकार सम्मेलनमा स्विचब्याक नेपालका सेल्स एण्ड मार्केटिङ एक्जुकेटिभ कुशल ओझाले जानकारी दिनुभयो ।

जसमा जुनियर (बालबालिका) तर्फ ११–१४ वर्ष उमेर समूहकाले र युवातर्फ १४–१६ वर्ष उमेर समूहका खेलाडीले प्रतिस्पर्धा गर्न पाउनेछन् । प्रतियोगितामा ७० जनाभन्दा बढी खेलाडीको सहभागिता रहने आयोजकले जनाएको छ ।

प्रत्यके विधाका विजेता, उपविजेता र तेस्रो हुनेलाई साइक्लिङका विभिन्न सामग्री पुरस्कार प्रदान गरिने ओझाले जानकारी दिनुभयो ।