मीना कंडेल
कावासोती, साउन ११ गते । पूर्वी नवलपरासीमा सूचनाबिना विद्युत् जाँदा स्थानीय उपभोक्ता समस्यामा परेका छन् । दैनिक २० पटकसम्म विद्युत् ट्रिपिङ (झ्याप्प–झ्याप्प विद्युत् कटौती) हुँदा विद्युतीय उपकरण बिग्रने गरेको स्थानीयको गुनासो छ ।
“लोडसेडिङको तालिका पनि छैन, कुनबेला बत्ती जाने हो, कुन बेला आउने हो पत्तै हुँदैन, यसको मार विद्युतीय उपकरणमा परेको छ” कावासोतीका विष्णु पोखरेलले भन्नुभयो । लोडसेडिङ कटौती भयो भन्नुमात्रै भएको उहाँको भनाइ छ ।
“सूचनाबिना विद्युत् कटौती हुनेगरेको छ । यसरी झ्याप्प बत्ती जाने र आउने गर्दा जिल्लावासीले दैनिक २० पटकभन्दा बढी विद्युत् ट्रिपिङको समस्या खेप्नुपरेको छ” उहाँले भन्नुभयो, “कहिले कम तथा कहिले अधिक भोल्टेजका कारण पङ्खा, फ्रिज, मोटरलगायतका विद्युतीय उपकरण बिग्रनेगरेको छ ।”
देवचुलीका शोभा भण्डारीले पनि बिनासुचना विद्युत् जाँदा समस्या भएको दुखेसो पोख्नुभयो । “बत्ती जाने र आउने समयको कुनै ठेगान नभएपछि मोवाइल चार्ज हुन पाउँदैन” उहाँले भन्नुभयो ।
अहिले गर्मी महिनामा विद्युतको माग अत्यधिक हुने भए पनि विद्युत् प्रवाह हुने रुट (प्रसारण लाइन) को क्षमता थोरै हुँदा उपभोक्ताले ट्रिपिङको समस्या झेल्नुपरेका नेपाल विद्युत प्राधिकरण कावासोती वितरण केन्द्रका इञ्जिनियर तिलकराम थनेतले बताउनुभयो ।
उपभोक्ताको समस्या आफूहरुले बुझे पनि जिल्लाबाट समस्या समाधान गर्न सम्भव नभएकाले केन्द्रसँग समन्वय गरिरहेको उहाँले बताउनुभयो । “अहिले मागभन्दा आपूर्ति कम भइरहेको छ । ट्रान्समिसन लाइन पर्याप्त नभएपछि साँघुरो रुटमा थोरै मात्रै विद्युत् प्रवाह हुन्छ” उहाँको भनाइ छ । जिल्लामा आपूर्तिभन्दा विद्युत् माग बढी हुँदा ट्रिपिङको समस्या देखिएको उहाँले बताउनुभयो ।
नवलपुरको विनयी त्रिवेणी गाउँपालिकामा ट्रान्समिसन लाइनको टावर निर्माणपश्चात् हेटौँडा–भरतपुर–बर्दघाट प्रसारण लाइन सञ्चालनमा आउने उहाँको भनाइ छ । भरतपुर–बर्दघाट प्रसारण लाइनको विकल्पमा अर्को प्रसारण लाइन सञ्चालनमा नआएसम्म जिल्लामा ट्रिपिङको समस्या समाधान गर्न कठिन भएको उहाँले बताउनुभयो ।
