बैङ्क लुटपाट आरोपमा भारतीय नागरिक पक्राउ

रवीन्द्र उप्रेती

बर्दिबास, साउन ११ गते । महोत्तरी गाउँपालिका २ स्थित बजार क्षेत्रमा रहेको एनएमबी बैङ्कमा लुटपाट गर्ने समूहका एक जनालाई प्रहरीले पक्राउ गरेको छ । 

घटनाको करिब ३ महिनापछि प्रहरीले भारत विहारको मधुवनी जिल्ला फूलहरस्थित गोपालपुर १३ हरलाखी टोलका २० वर्षीय अजयकुमार साफीलाई बुधवार नेपाल प्रवेश गरेको मौका पारी नियन्त्रणमा लिएको हो । साफीलाई एरिया घेराबन्दी गरी सीमावर्ती नगरपालिका मटिहानी ८ बाट पक्राउ गरेको जिल्ला प्रहरीले जनाएको छ । 

नम्बर नखुलेको २ वटा मोटरसाइकलमा हतियारसहित आएका ४ जना नकाबधारी समुहले महोत्तरी गाउँपालिका २ स्थित बजार क्षेत्रमा रहेको एनएमबी बैङ्कमा जेठ १६ गते अपराह्न लुटपाट गरी फरार भएका थिए । प्रहरी उपरीक्षक प्रकाश मल्लका अनुसार लुटेरा समूहले पेस्तोल देखाएर बैङ्कका कर्मचारीलाई काबुमा पारी  १५ लाख एक हजार ४९३ रुपियाँ लुटपाट गरी भागेका थिए ।