काठमाडौं, असार ३ गते । नेपाल सेन्ट्रल एसियन भलिबल एसोसिएसन (काभा) पुरुष भलिबल नेसन्स लिगको पहिलो खेलमा मङ्गोलियासँग पराजित भएको छ । किर्गिस्तानको बिस्केकस्थित स्पोर्ट्स एन्ड रिक्रिएसन कम्प्लेक्समा आइतबार भएको खेलमा नेपाल मङ्गोलियासँग ३–१ को सेटमा पराजित भएको हो ।
मङ्गोलियाले नेपालमाथि २५–१९, २५–२०, २५–२७, २५–२० को नतिजा निकालेको थियो । लिगमा नेपालसहित सात टोलीको सहभागिता रहेको छ । नेपालले दोस्रो खेल सोमबार किर्गिस्तानसँग खेल्नेछ । यस्तै तेस्रो खेल मङ्गलबार इरान, चौथो खेल बिहीबार तुर्किमिनिस्तान, पाँचौं खेल किर्गिस्तानको ‘बी’सँग शुक्रबार र अन्तिम खेल आइतबार उज्वेकिस्तानसँग खेल्नेछ ।
सिङ्गल राउन्ड रोबिन लिगको आधारमा सञ्चालित प्रतियोगिताको शीर्ष दुई टोलीबीच उपाधि भिडन्त हुनेछ । लिगको तेस्रो र चौथो टोलीबीत तेस्रो स्थानका लागि प्रतिस्पर्धा हुनेछ ।
