सुजन काफ्ले
दोलखा, असार २ गते । नेपाल सरकारका उपप्रधानमन्त्री तथा गृहमन्त्री नारायणकाजी श्रेष्ठले सरकारले नयाँ ढङ्गले काम सुरु गरेको बताउनुभएको छ । शनिबार दोलखा सदरमुकाम चरिकोटमा उद्योग व्यवसायीसँगको छलफल कार्यक्रममा मन्त्री श्रेष्ठले सो कुरा बताउनुभएको हो ।
भ्रष्टाचार गर्ने व्यक्ति कुन पार्टीको छ, कति शक्तिशाली छ भनेर नहेरी निष्पक्ष रूपले अनुसन्धान गरेर कानुनको दायरामा ल्याइने श्रेष्ठले बताउनुभयो । अहिलेको सरकारले जनताले अपेक्षा गरेअनुसारको काम गर्ने बताउँदै उहाँले जनताको कुरामा सरकार गम्भीर रहेको उहाँको भनाइ छ ।
राजधानी काठमाडौंमा नयाँ बसपार्क सार्दा अपायक भएको भन्दै व्यवसायीले गुनासो गरेपछि उहाँले जनता र यातायात व्यवसायीलाई सहज हुनेगरी सही ढङ्गले छलफल गरी अगाडि बढ्ने उहाँले बताउनुभयो ।
