काठमाडौं, जेठ २३ गते । नेपाली कांग्रेसका नेता विमलेन्द्र निधिले संविधान र सङ्घीयताको कार्यान्वयनलाई उच्च प्राथमिकता दिइनुपर्ने बताउनुभएको छ ।
प्रतिनिधि सभाको आजको बैठकमा आव २०८०/८१ को राजस्व र व्ययको वार्षिक अनुमानमाथिको छलफलमा भाग लिनुहुँदै उहाँले संविधानको कार्यान्वयनका लागि कार्यपालिका, न्यायपालिका र व्यवस्थापिका, राजनीतिक दल, नागरिक समाज र सञ्चार जगत् प्रतिबद्ध हुनुपर्ने बताउनुभयो ।
उहाँले निर्वाचन तालिकालाई बदलेर संसद्, प्रदेश र स्थानीय तहको निर्वाचन गर्न सुझाव दिनुभयो । नेता निधिले भन्नुभयो, “यसले सङ्घीयताको सफल कार्यान्वयनमा सहयोग पुग्छ, यसका लागि जे जे संशोधन गर्नुपर्छ त्यो गरौँ ।” संविधानलाई कार्यान्वयन गर्ने हो भने जन्मसिद्ध नागरिकका सन्तानलाई नागरिकता दिनेमा कसैले पनि कुनै बाधा अड्चन गर्न नहुने उहाँले बताउनुभयो । “न संसद्, न कार्यपालिका, न न्यायालयले अवरोध गर्न पाउँछ”, उहाँले भन्नुभयो ।
उहाँले मुलुकै पुरानो त्रिभुवन विश्वविद्यालयलाई ‘एक्सलेन्स’ सेन्टरका रूपमा विकास गरिनुपर्नेमा जोड दिनुभयो । नेता निधिले बाँकी आङ्गिक र सम्बन्धप्राप्त क्याम्पसलाई नयाँ विश्वविद्यालयका रूपमा विकास गरिनुपर्ने बताउनुभयो । “क्षेत्रगत र विषयगतरुपमा धेरै विश्वविद्यालय भएमा रोजगारी पनि सिर्जना हुन्छ, उच्च शिक्षा अध्ययनका नाममा बिदेसिने रकम पनि जोगिन्छ”, उहाँले भन्नुभयो ।
बजेटको अनुसूचीमा धेरै संस्थाका पुनः संरचनाको विषय राखिएको भए पनि त्रिविको पुनः संरचना गर्ने विषय नसमेटिएको भन्दै सरकारको ध्यानाकर्षण गराउनुभयो । “जुन देशले मानव जनशक्ति विकासमा ठुलो लगानी गर्छ, त्यही देशले नै समृद्धि र विकासका यात्रा अगाडि बढाउन सक्छ । उच्चस्तरको जनशक्ति नभएमा उच्च विकासको आशा कसरी गर्ने ? त्रिविलाई पुनः संरचना गरियोस्”, नेता निधिले भन्नुभयो । रासस
