चट्याङ लागेर एक जनाको मृत्यु

म्याग्दी, जेठ ४ गते । वर्षा सँगै परेको चट्याङ लागेर मङ्गला गाउँपालिका –३ मा एक जना महिलाको मृत्यु भएको छ । मङ्गला गाउँपालिका –३ सातबिसे घर भै मङ्गला गाउँपालिका –३ कै घाम्ताङमा छोरीको घरमा गएकी ६० वर्षीया महिला चट्याङ्ग लागेर मृत्यु भएको इलाका प्रहरी कार्यालय दरवाङका प्रहरी निरीक्षक सागर पन्तले बताउनुभयो । 

छोरीको घरमा आएकी जगदेवी कामीको चट्याङ लागेर घटनास्थलमै मृत्यु भएको उहाँले जानकारी दिनुभयो । उहाँले भन्नुभयो बुधबार चट्याङ लागेर मृत्यु भएको मृतकका ज्वाइँले प्रहरीमा खबर गरेका थिए । मृतकको सब पोस्टमार्टमका लागि सदरमुकाम बेनी स्थित बेनी अस्पतालमा राखिएको जिल्ला प्रहरी कार्यालय म्याग्दीका प्रहरी निरीक्षक सूचना अधिकारी किरण लामाले बताउनुभयो । 

घटनाको जानकारी पाउँदासाथ इलाका प्रहरी कार्यालय दरवाङका प्रहरी निरीक्षक पन्तको नेतृत्वमा टोली घटनास्थल पुगेको थियो । घटनास्थल मुचुल्का बनाएर सबलाई बेनी अस्पतालमा पठाएको उहाँले बताउनुभयो ।