काठमाडौँ, वैशाख ३० गते । काठमाडौँ उपत्यकामा वितरण हुँदै आएको मेलम्चीको पानी आगामी जेठ १ गतेदेखि पुनः रोकिने भएको छ । मेलम्ची खानेपानी आयोजनाका इन्जिनियर पदम कुँवरले आयोजनाको मुहान तथा हेडवक्र्समा केही उपकरण जडान तथा मर्मत सम्भार गर्नुपर्ने भएकाले दुई हप्ताका लागि पानी वितरण बन्द गरिने जानकारी दिनुभयो ।
“गेट नम्बर ९ मा रहेको हेडवक्र्समा नयाँ सिलिन्डर जडान गर्नुपर्ने छ । त्यसका लागि पानीको प्रवाह नै बन्द गर्नुपर्ने हुन्छ । पोहोर सालको बाढीले सिलिन्डर बिगारेको थियो,” उहाँले भन्नुभयो, “गेट नम्बर १ मा पनि जाली राख्नुपर्ने छ । गत वर्ष फलामको पाता राखेर पानी बन्द गरिएको थियो ।’’
उहाँले ठुलो बाढी आएको बेला सुरक्षित रूपमा आयोजनालाई बन्द गर्न मिल्ने र सामान्य बाढी आएको बेला आयोजनालाई सञ्चालनमा नै राख्ने गरी अहिले उपकरण जडान तथा मर्मत सम्भार गर्न लागिएको जानकारी दिनुभयो । उहाँले मर्मत सम्भारपछि पानी वितरण कार्य पुनः नियमित रूपमा सुरु गरिने बताउनुभयो ।
कुँवरले भन्नुभयो, “पोहोर सालको जस्तो यस वर्ष जेठ १७ गते नै पानी वितरण बन्द गर्नु पर्दैन । यो वर्ष पोहोर सालभन्दा कम्तीमा एक महिना भए पनि उपभोक्तालाई बढी पानी खुवाइने छ । सानोतिनो बाढीपहिरोमा आयोजना बन्द गर्नु पर्दैन ।’’
२०७९ मङ्सिर २३ गतेदेखि तेस्रो पटक काठमाडौँमा मेलम्ची खानेपानी आयोजनाको पानीको वितरण सुरु भएको थियो । २०७७ चैतमा अस्थायी रूपमा पहिलो पटक र २०७८ चैतमा दोस्रो पटक मेलम्चीको पानी अस्थायी रूपमा राजधानी आइपुगेको थियो ।
भूगर्भ तथा खानी विभागका भूगर्भविद् शिव बाँस्कोटाले पोहोर साल बाढीपहिरो आएको ठाउँमा कुनै पनि रोकथाम तथा पूर्वतयारी नगरिएकाले यो वर्षको वर्षायाममा पनि बाढीपहिरोको सम्भावना कायमै रहेको बताउनुभयो । उहाँले मेलम्ची क्षेत्रमा बाढीपहिरोको विपत् अहिलेसम्म नटरेको उल्लेख गर्नुभयो ।
