दोलखा समाचारदाता
दोलखा, चैत १४ गते । दोलखाको शैलुङ गाउँपालिका–७ मा सुविधासम्पन्न चर्नावती वृद्धाश्रम निर्माण भएको छ।
भवनको भित्री व्यवस्थापनको काम पनि अन्तिम चरणमा पुगेको चर्नावती त्रिवेणी विकास सङ्घका अध्यक्ष गुणबहादुर बुढाथोकीले बताउनुभयो।
उहाँका अनुसार चर्नावती वृद्धाश्रमको पहलकदमी २०६९ सालमा र भवन निर्माण २०७४ सालमा सुरु गरिएको हो। पाँच करोड रुपियाँमा भवन निर्माण हुने विस्तृत परियोजना प्रस्ताव (डीपीआर) तयार भए पनि दुई करोड ५६ लाख रुपियाँमा ठेक्का सम्झौता भएपछि संरचना अधुरो पारेर छोड्दा लामो समय लागेको हो।
पहिला महिला तथा बालबालिका कार्यालय मातहत रहे पनि पछिल्लो राजनीति विकाससँगै कसले हेर्ने भन्नेमै अन्योल बन्यो। चर्नावती त्रिवेणी विकास सङ्घका अध्यक्ष बुढाथोकीले भन्नुभयो, “अन्तिममा गाउँपालिकाले हेर्ने टुङ्गो लागेपछि निर्माण अघि बढेको हो। बजेट समयमा नआउने झन्झटले पनि निकै सतायो। अब भने तान्तुन गरेर निर्माण सम्पन्न भएको छ।”
सुरक्षाका लागि कम्पाउन्ड वाल लगाउनुपर्ने समस्या छ। बजेट अभावले सताएको छ, उहाँले गुनासो पोख्नुभयो। सञ्चालन गर्नका लागि ओढ्ने, ओछ्याउने खाटलगायतको तयारी भइरहेको छ। शैलुङ गाउँपालिकाले बर्सेनि पाँच लाख रुपियाँ अनुदान दिँदै आएको छ। मात्र १० लाख रुपियाँ बचत रहेको छ।
गाउँपालिकाका प्राविधिक रामकाजी कार्कीका अनुसार करिब २५ रोपनी जग्गामा बनेको ७८ झ्याले भवनमा तीन तला र तलैपिच्छे तीन/तीनवटा शौचालयसहितका २१ कोठा रहेका छन्। भवनभित्रै भान्साकोठा र प्रतीक्षालयसमेत छ।
तामाकोशी, चर्नावती र गोपीखोलाको सङ्गम स्थल भएकाले यो क्षेत्रलाई त्रिवेणी भनिएको हो। भारतको गयामा श्राद्ध गर्न जानेलाई नेपाली उत्तरगयाका रूपमा रहेको चर्नावतीमा पहिला श्राद्ध नगरी तीर्थ पूरा नहुने भन्ने गरिएको बूढापाकाहरू बताउँछन्।
यो ठाउँ पवित्रताको हिसाबले मात्र होइन, काठमाडौँ, भारतको गया र चीनबाट पनि नजिक रहेको छ। यसको आसपासमा भीमेश्वर नगरपालिका, वैतेश्वर, तामाकोशी र शैलुङ गाउँपालिकाको पायक पर्ने ठाउँमा उत्तम त्रिवेणीघाट पनि निर्माण भइसकेको छ।
