भारतमा मजदुरी गर्न गएका युवकको हत्या

जनार्जन खत्री

सर्लाही, फागुन २७ गते । भारतमा मजदुरीका लागि गएका सर्लाहीका एक युवकको हत्या भएको छ । दक्षिणी सीमावर्ती क्षेत्रस्थित गोडैता नगरपालिका–१२ का ४० वर्षीय रोजा बैठाको भारतीय युवकले कुटपिट गरी हत्या गरेको हो । 

विगत चार महिनादेखि साथीहरूसँगै भारतको पञ्जाबमा बसेर मजदुरी गर्दै आएका बैठाको त्यहीँ हत्या भएको परिवारले जनाएको छ । फागुन २४ गते साँझ बैठामाथि भारतको विहार राज्य सितामढी जिल्ला मेजरगञ्ज थाना बैहरा ग्राम बस्ने ३५ वर्षीय महेश माझीले कुटपिट गरी दाउराले प्रहार गरेर गम्भीर घाइते बनाएका थिए । स्थानीय अस्पतालमा उपचारपश्चात् कोठामा बसेका बैठाको फागुन २५ गते बिहान ४ बजेतिर मृत्यु भएको हो । 

मृतक बैठाको शव शुक्रबार साँझ पञ्जाबबाट गोडैतास्थित घर ल्याइएको छ । घटनाबारे जानकारी प्राप्त भएपश्चात् प्रहरी टोली पठाएर मृतकको शवलाई प्रादेशिक अस्पताल मलङ्गवा ल्याइ पोष्टमार्टम गरेर शनिबार बिहान परिवारलाई बुझाइएको सर्लाही प्रहरीका सूचना अधिकारी एवम् प्रहरी नायव उपरीक्षक कैलाश राईले बताउनुभयो । उहाँले घटना भारतमा भएको र अभियुक्त पनि भारतीय नागरिक नै भएकाले यहाँको प्रहरीले घटनाको सम्बन्धमा अनुसन्धान गरी कारबाही चलाउने अवस्था नरहेकोसमेत जानकारी दिनुभयो। 

प्रहरी नायव उपरीक्षक राईले उताबाट शवको पोष्टमार्टम नगरी पठाइएकाले सदरमुकाम ल्याएर पोष्टमार्टम गर्न प्रहरीले समन्वय गरिदिएको बताउनुभएको छ । कुटपिट गर्ने मानिस र कानुनी प्रक्रियाका सम्बन्धमा भारतीय प्रहरीसँग समन्वय गरिने जिल्ला प्रहरी कार्यालय मलङ्गवाले जनाएको छ ।