समाचारको धुलो

मस्तिष्क भोजको राजकीय थालीमा

सुन्दर मासुका टुक्राहरू

राजनीतिको लुतो कन्याइरहेकाहरू

परमानन्द ब्रेकफास्टमा

पपकर्न डेमोक्रेसी

लिपिस्टिक क्रान्ति

दैनिक समाचारहरूको बुस्टर डोजमा

सहरको ढाड कन्याइरहेका

बुद्धिजीवीहरू

रानी एकान्तमा 

पोषण पाइरहेको कवि

राज्य द्वारबाट बेपत्ता छन् ।

बाटोले बाटो बोकिरहेको छ 

खुट्टाको चेतनाले दौडिरहेका

आँखाले चाट्ने विन्दुहरूमा ।

समाचारको धुलो आँखाबाट 

पन्छाउँदै

दैनिक आफ्नो अनुहार फर्काउन खोज्छु

सहरको फलकबाट ।

काठमाडौँ ओर्लेर

काठमाडौँ

पहिचान खुर्कंदै । 

पाल्पा

हाल : काठमाडौँ