अस्पताल नहुँदा समस्या

कावासोती समाचारदाता

कावासोती, माघ २० गते । पूर्वी नवलपरासीस्थित विनयी त्रिवेणी गाउँपालिकाको दुम्किबास क्षेत्रमा अस्पताल नहुँदा स्थानीय समस्यामा परेका छन्। करिब ४० हजार सर्वसाधारणको बसोबास रहेको विनयी त्रिवेणीमा सुविधासम्पन्न अस्पताल आवश्यक रहेको छ। 

समयमै अस्पताल बन्न नसक्दा आफूहरूलाई समस्या भएको स्थानीय सौरभ गिरीले बताउनुभयो। यहाँका वृद्ध, अशक्त बिरामी तथा सुत्केरीले अस्पतालको भरपर्दो सुविधा लिन ६० किलोमिटर पूर्वको भरतपुर वा त्यति नै दूरी पश्चिमको बुटवल पुग्नुपर्ने अवस्था रहेको छ। 

विनयी त्रिवणी गाँउपालिकामा न बच्चा जन्मिन सुरक्षित अस्पताल छ, न मानिस बित्दा लैजाने घाट नै रहेको छ। साबिकको त्रिवेणी सुस्ता, राकाचुली, वेणी मणिपुर, धुर्काेट र दुम्किबास समेतका पाँच गाविस मिलेर बनेको विनयी त्रिवेणीमा दाहसंस्कार घाट नभएको पालिका अध्यक्ष घनश्याम गिरीले बताउनुभयो। 

त्रिवेणीधाम, दाउन्ने, दुम्किबास र सर्दी क्षेत्रको बढ्दो बजारीकरण, होङ्सी तथा सीजीजस्ता ठूला सिमेन्ट कारखानालगायत दर्जन ठूला ह्याचरी उद्योग रहेको यो क्षेत्रमा बिरामी पर्दा होस् या मानिस मर्दा चाहिने वैद्य, घाट केही नहुनु दुःखको कुरा भएको स्थानीय बताउँछन्।

प्राकृतिक हिसाबले तीनतले गाउँपालिका विनयी त्रिवेणीमा तराई, भित्री मधेश र पहाडको भूबनोट रहेको छ। चुरे, शिवालिक र महाभारत पर्वत शृङ्खलामा बाँधिएको यो पालिका गण्डकी प्रदेशको एक मात्र भारतसँग जोडिएको सीमानाकामा पर्छ। 

पूर्व–पश्चिम यात्राको कठिन खण्ड दाउन्ने पहाड तथा तथा दुम्किबास पूर्वको चक्ला वन क्षेत्रमा बारम्बार भइरहने सडक दुर्घटनाका बिरामीको उपचारार्थ यहाँ एक सरकारी अस्पताल निर्माण गर्न स्थानीयले माग गर्दै आएका छन्।