विजयकुमार साह
ढल्केबर, माघ २० गते । धनुषाको ढल्केबरमा रहेको कृषि बजार व्यवस्थापन समितिले किसान तथा व्यापारीका लागि कर छुटसहित विभिन्न सेवा सुविधा उपलब्ध गराएपछि बजारमा क्रेता र बिक्रेताको सङ्ख्या बढेको छ ।
बजार व्यवस्थापन समितिले बिक्री तथा निकासी करमा छुट, व्यापारीलाई तरकारी खरिद गर्न रकम सापटी, बासको व्यवस्था, भ्रमण र किसानलाई पुरस्कृत तथा कृषि तालिमजस्ता सुविधा उपलब्ध गराउने थालेको हो ।
सस्तो मूल्यमा हरियो तरकारी तथा ताजा फलफूल पाइने बजारका रूपमा पहिचान बनाएको यो बजारमा किसानसँग तरकारी तथा फलफूल बिक्री गरेबापतको कर र खरिदकर्ता व्यापारीसँग निकासी कर लिँदै आएको थियो । बजार व्यवस्थापन समितिले एक महिनादेखि यी कर छुट गर्दै आएको छ ।
यसअघि बजार ठेक्कामा लाग्ने गरेको थियो । बजार ठेकेदारले एक ढाकी तरकारी बिक्री गरेबापत किसानबाट १० देखि २० रुपियाँ र एक पिकअप गाडी तरकारी निकासी गरेबापत एक हजार पाँच सयदेखि दुई हजार रुपियाँसम्म व्यापारीसँग कर असुल्थ्यो ।
बजार व्यवस्थापन समितिका अध्यक्ष बुधेश्वर महतोले किसान र व्यापारीसँग लिँदै आएको सबै प्रकारको कर छुटलगायत सामान खरिद गर्दागर्दै रकम अपुग भएका व्यापारीलाई सापटी रकमसमेत उपलब्ध गराउने व्यवस्था गरेको बताउनुभयो । उहाँले एक साताका लागि एक जना व्यापारीलाई २५ हजार रुपियाँसम्म सापटी दिने गरिएको जानकारी दिनुभयो ।
यहाँ बजार लागेको दिन पाँच हजार किसानले आ–आफ्नो उत्पादन बिक्रीका लागि र एक हजार पाँच सयभन्दा बढी व्यापारी खरिद गर्न आउने गरेको अध्यक्ष महतोले बताउनुभयो ।
आइतबार, बुधबार र शुक्रबार गरी हप्ताको तीन दिन लाग्दै आएको यस बजारलाई दैनिकसमेत गरिएको छ । बजारमा स्थानीयस्तरमा उत्पादन भएको तरकारी तथा फलफूल सस्तो मूल्यमा पाइने हुँदा काठमाडौँ, पोखरा, सिन्धुली, जनकपुरलगायतका क्षेत्रबाट व्यापारी यहाँ आउने गरेका छन् ।
यो बजारमा जिल्लाको बेङ्गाडाबर, पुष्पवलपुर, बटेश्वर र नकटाझिजलगायत दर्जनौँ गाउँका किसानले उत्पादन गरेको तरकारी तथा फलफूल यही बजारमा बिक्रीका लागि ल्याउने गरेका छन् ।
कृषि बजार व्यवस्थापन समितिका कार्यालय प्रमुख शम्भु दासले गत आर्थिक वर्षमा ५२ करोड ९९ लाख २० हजार ९४८ रुपियाँ मूल्य बराबरको पाँच हजार ९६२ मेट्रिक टन तरकारी खरिद–बिक्री भएको थियो ।
चालू आर्थिक वर्षको साउनदेखि पुस मसान्तसम्म २९ करोड ८५ लाख २८ हजार ५४२ रुपियाँ मूल्यको तीन हजार २५४ मेट्रिक टन तरकारी तथा फलफूल किनबेच भएको छ ।
