नियालेको छु तिमीलाई
कहिले समीप त कहिले दूरबाट
धेरै वर्षदेखि सबै यामहरूमा
ए शैलचुली !
म तिमीसँगै बात मारिरहेको छु ।
रङ्गियौ कहिले गुराँसे बैँससँग
सेताम्य चाँदीको गजुरझैँ सिँगारियौ पनि
हरियाली रङले ऋतुराजमा बन्यौ मोहिनी ।
यो पनि त देखेँ–
कहिले भिज्यौ झरीसँगै
गुम्सियौ बादलसँगै
हरायौ कुहिरोभित्र
उजाडियौ गृष्मसँगै ।
प्रकृतिका तिकडम झेलिरहेका छौ
तर पनि वेदनाहरू लुकाई अग्लिएका छौ
अनेक रङले सुरम्य छौ
अटल, निश्चल र सदाझैँ शान्त छौ ।
तिमीले नभनेका तिम्रा व्यथाहरू बुझेको छु
तिम्रा सुसेलीहरू सुनेको छु
तिम्रा याम र घामजस्तै
मेरा याम र घामहरू ।
जीवन–
केही उकालीहरूमा उक्लियो
केही ओरालीहरूमा गुज्रियो
समय चक्रसँगै
चैते डढेलो बेहोर्नुप¥यो
कालो रङहरू पनि पोतियो
कुटिए धेरै थान रहरहरू असिनाले ।
फेरि जुर्मुराए केही सपनाहरू
दिन र रात, घाम र छायाँसँगै
अङ्कुरित भए आस्थाका बीजहरू ।
ओ शैलराज ! मलाई पनि
तिम्रो छातीमा जस्तै आफ्नो छातीमा
सतिसाल उभ्याउन मन छ
तिमीले जस्तै आकाश चुम्ने रहर छ
तिमीसँगै ढल्ने र मर्ने मन छ
तिम्रै गर्भमा विलीन हुने मन छ ।
