केदार तिमल्सिना
काभ्रेपलाञ्चोक, माघ १२ गते । काभ्रेपलाञ्चोकको बनेपा नगरपालिका –११ मा रहेको आदर्श बिद्या मन्दिर (एवीएम स्कुल) मा कक्षा ११ र १२ मा सामाजिक विषयमा अध्ययनरत बिद्यार्थीले खाजा तथा तिहारमा देउसीभैलो कार्यक्रमबाट सङ्कलन भएको रकम आगलागी पीडित एकल महिलालाई सहयोग गरेका छन् ।
एक कार्यक्रमबीच बिहीबार जिल्ला समन्वय समिति काभ्रेपलाञ्चोकका प्रमुख दिपककुमार गौतमले बिद्यार्थीले सङ्कलन गरेको ४० हजार १५० रुपियाँ रकम बनेपा नगरपालिका–१० जनागालकी आगलागी पीडित एकल महिला भवानी हुमागाईलाई हस्तान्तरण गर्नुभएको हो ।
विद्यार्थीले एकल महिलाको छोराछोरीलाई बिद्यालयले कक्षा १२ सम्म निःशुल्क पढाइदिने, कानुन सङ्कायका विद्यार्थीले निःशुल्क कानुनी सहयोग गर्ने र आमसञ्चार विषयमा अध्ययनरत विद्यार्थीले उहाँको अवस्थाका विषयमा अध्ययन गर्ने निर्णय गरेका छन् । बिद्यालयमा अध्ययनरत बिद्यार्थीले व्यवहारिक शिक्षा लिने र दिनेक्रममा पीडित महिलालाई सहयोग गरेको बिद्यालयका प्रिन्सिपल रामप्रसाद तिमल्सिनाले जानकारी दिनुभयो ।
कार्यक्रममा समन्वय प्रमुख गौतमले आगलागी पीडित हुमागाईलाई राहत दिलाउन आफ्नो स्थानबाट सक्दो प्रयास गर्ने प्रतिवद्धता जनाउनुभयो । सहयोग रकम हस्तान्तरण कार्यक्रममा लैङ्गिक हिंसाविरुद्धको सचेतना कार्यक्रम समेत सञ्चालन गरिएको थियो ।
कार्यक्रममा बनेपा नगरपालिकाका उपप्रमुख बिमला सापकोटा दाहालले आगलागी पीडित एकल महिलाको आवास निर्माणको लागि नगरपालिकाले सहयोग गर्ने प्रतिवद्धता जनाउनुभयो । कार्यक्रममा बनेपा नगरपालिका–१० का वडा अध्यक्ष चन्द्रबहादुर खड्का, वडा नम्बर–११ का वडा अध्यक्ष शिवकुमार थापालगायतको उपस्थिति थियो ।
