काठमाडौं, माघ १२ गते। सत्तारुढ नेकपा (माओवादी केन्द्र) को स्थायी समिति बैठकमा प्रधानमन्त्री एवम् पार्टी अध्यक्ष पुष्पकमल दाहाल ‘प्रचण्ड’ ले समसामयिक राजनीतिक विषयमा मौखिक र लिखित संक्षिप्त प्रतिवेदन पेस गर्नुभएको छ।
प्रवक्ता कृष्णबहादुर महराले आजको बैठकमा सङ्गठन विस्तार, समीक्षा लगायतका विषय राखिएकोमा अध्यक्ष प्रचण्डले अहिलेको स्थितिबारे धारणा राख्नुभएको बताउनुभयो। पेरिसडाँडास्थित केन्द्रीय कार्यालयमा बैठक सम्पन्नपछि प्रवक्ता महराले सञ्चारकर्मीसँग भन्नुभयो, “धेरै एजेण्डा पेस भए। मुख्य एजेण्डा के के थिए भने, अध्यक्षबाट संक्षिप्त प्रतिवेदन र सबैभन्दा पहिले अध्यक्षबाट सङ्गठन विस्तार, समीक्षा लगायतका विषयमा एजेण्डा राखेका थियौँ।”
उहाँले माओवादी केन्द्रको नेतृत्वमा सरकार बनेकोमा प्रधानमन्त्री प्रचण्डलाई बधाई ज्ञापन गर्नुका साथै उपमहासचिव वर्षमान पुनको स्वास्थ्य लाभको कामना गरिएको बताउनुभयो। यसैगरी, यति एयरलायन्स लगायतका दुर्घटनाका पीडितलाई राहत दिने सन्दर्भमा पनि बैठकमा छलफल भएको उहाँले बताउनुभयो।
उहाँले थप भन्नुभयो, “अहिलेको स्थितिबारे अध्यक्षले संक्षिप्त मौखिक र लिखित समसामयिक राजनीतिक प्रतिवेदन पेस गर्नुभयो, वास्तवमा हिजोदेखि सरकार बन्नुभन्दा पहिले चुनावमा हाम्रो पार्टीको स्थिति, सरकार बन्दा गठबन्धन छोडेर अर्को सहमति गर्न खोज्नु त्यो स्थितिबारे छलफल भएको छ।”
उहाँले बैठक शुक्रबार पुनः बस्ने गरी टुङ्गिएको जानकारी दिनुभयो।
