बाँकेमा दादुरा नियन्त्रणतर्फ, ५१ जना निको हुन बाँकी

सिराज खान 

नेपालगञ्ज, माघ १२ गते । बाँकेको नेपालगञ्ज उपमहानगर लगायत पाँच वटा पालिकामा फैलिएको दादुरा सङ्क्रमण नियन्त्रणमा आउँदैगएको छ । प्रभावित पालिकाका अधिकांश बालबालिकालाई खोप लगाएपछि सङ्क्रमण फैलिनेक्रम रोकिएको स्वास्थ्य कार्यालय बाँकेले जनाएको छ । 

सो कार्यालयका खोप सुपरभाइजर नरेश श्रेष्ठका अनुसार नेपालगञ्ज उपमहानगरको वडा नम्बर ७ मा सबैभन्दा पहिले देखिएको सङ्क्रमण जिल्लाको कोहलपुर नगरपालिका, खजुरा, नरैनापुर र डुडुवा गाउँपालिकामा समेत फैलिँदै गएपछि नियन्त्रण गर्न खोप अभियानलाई तीव्र गतिमा सञ्चालन गरिएको छ । 

नेपालगञ्ज ५ का ३१ महिने एक बालकको दादुराबाट मृत्यु भएपछि नियन्त्रण अभियान तीव्र पारेर जिल्लाका पाँच वटै प्रभावित पालिकाका ६ महिनादेखि १५ वर्ष भित्रको उमेरका ८१ प्रतिशत बालबालिकालाई खोप लगाइएपछि सङ्क्रमण नियन्त्रणमा आएको खोप सुपरभाइजर श्रेष्ठले बताउनुभयो । 

उहाँका अनुसार दादुरा सङ्क्रमण प्रभावित पाँचवटा पालिकाका एक लाख १५ हजार ५९९ बालबालिकालाई खोप लगाउने लक्ष्यका साथ अभियान सुरु गरिएकोमा हालसम्म ९३ हजार १६१ जनालाई खोप लगाइसकिएको छ । 

प्रभावित पालिकाका अधिकांश बालबालिकाले खोप पाएपछि सङ्क्रमण नियन्त्रणमा आएको स्वास्थ्य कार्यालयले जनाएको छ । सो कार्यालयका अनुसार २८ हजार ४५६ जना बालबालिका मात्र खोप लगाउन बाँकी रहेकाले उनीहरूलाई खोप लगाउने काम भइरहेको छ । 

खोप अभियान अन्तर्गत सबैभन्दा बढी नेपालगञ्जका विभिन्न वडामा ४७ हजार ९२५, खजुरा गाउँपालिकामा १८ हजार ४१२, नरैनापुरमा १३ हजार १४० र डुडुवा गाउँपालिकामा ११ हजार २९६ र कोहलपुर नगरपालिकामा दुई हजार ३८८ जना ६ महिनादेखि १५ वर्षमुनिका बालबालिकालाई  खोप लगाइएको स्वास्थ्य कार्यालयले जनाएको छ । 

सो कार्यालयका खोप फोकल पर्सन श्रेष्ठका अनुसार बाँकेमा २९२ जना दादुराका बिरामी फेला परेकोमा २४० जना निको भैसकेका छन् । ५१ जनाको घरमै राखेर उपचार भइरहेको छ । एक जना बालकको भने मृत्यु भएको थियो । 

समुदायस्तरमै दादुरा प्रभावित बालबालिकाको सङ्ख्या बढ्दै गएपछि रोक्न सुरु गरिएको खोप अभियानले गर्दा हाल आएर दादुराका सङ्क्रमित भेटिनेक्रम रोकिएको जनाइएको छ । 

दादुरा महामारी नियन्त्रणका लागि खोप अभियानसँगै बिरामीको खोजी र सचेतना अभियान पनि स्वास्थ्य कार्यालयले तीव्र रूपमा सञ्चालन गरेको थियो ।