कुलोमा डुबेर युवकको मृत्यु

जनार्जन खत्री

सर्लाही, माघ १२ गते । सर्लाहीको हरिपूर्वा नगरपालिकामा बिहीबार एक युवकको कुलोमा डुबेर मृत्यु भएको छ । जिल्लाको दक्षिण–पूर्वी भेगस्थित हरिपूर्वा नगरपालिका –९, वसन्तपुर पछियारी टोल बस्ने १८ वर्षीय ललन राय यादवको बोरिङबाट सिँचाई गर्न बनाइएको कुलोमा डुबेर मृत्यु भएको हो । 

बिहीबार बिहान घर नजिकैको कुलोभित्र युवकलाई मृत अवस्थामा देखेपछि स्थानीयले प्रहरीमा खबर गरेका थिए । घटनास्थलको प्रकृति मुचुल्का गरी मृतकको शव पोष्टमार्टमका लागि प्रादेशिक अस्पताल मलङ्गवा पठाइएको इलाका प्रहरी कार्यालय लालबन्दीका प्रहरी निरीक्षक शान्तराम कार्कीले जानकारी दिनुभयो । स्थानीयका अनुसार मृतक युवकले प्रायः लागूऔषध सेवन गर्ने गर्थे ।