जस्तै जुनेली नभ हुन्छ राम्रो
झुल्के बिहानी पनि हुन्छ राम्रो ।
सदैव यौटै क्षण हुन्न राम्रो
होस् एक त्यस्तै घरबार हाम्रो ।। १ ।।
जस्तै वसन्ती फूल हुन्छ राम्रो
बेली चमेली पनि हुन्छ राम्रो ।
हुँदैन यौटै चिज वस्तु राम्रो
होस् एक त्यस्तै घरबार हाम्रो ।। २ ।।
झरिरहेको झरना छ राम्रो
गुराँस फुल्दा वन शैल राम्रो ।
सदैव यौटै सुख हुन्न राम्रो
होस् एक त्यस्तै घरबार हाम्रो ।। ३ ।।
जस्तै शरद् सुन्दर याम राम्रो
झरी भदौरे पनि हुन्छ राम्रो ।
सदैव यौटै स्थिति हुन्न राम्रो
होस् एक त्यस्तै घरबार हाम्रो ।। ४ ।।
बस्दा सभामा जति ज्ञान राम्रो
एकान्त बस्दा त्यति ध्यान राम्रो ।
सदा सदा हे ! जति शान्ति राम्रो
होस् एक त्यस्तै घरबार हाम्रो ।। ५ ।।
वसन्तको सान निकुञ्जभित्र
क्वैली चराको कुहुको विचित्र ।
आवाज सुन्दा जति लाग्छ राम्रो
होस् एक त्यस्तै घरबार हाम्रो ।। ६ ।।
एकान्त रात्रिबीच जून डुल्दा
यैभित्र लाखौँ चिज वस्तु खुल्दा ।
मिलिरहेको जति चित्र राम्रो
होस् एक त्यस्तै घरबार हाम्रो ।। ७ ।।
