१. परिवर्तन
कसैको आँशु मोती हुन्छ
कसैको आँशु पानी हुन्छ
कहानी मोतीको आफ्नै
कहानी पानीको आफ्नै
झिँजा, दाउरा, मूढाको आफ्नै
रापतापमै चम्किन्छ जीवन
सुन झन झन खारिन्छ
दाउरा जलेर खरानी हुन्छ ।
२. देशप्रेम
गुमाने गाउँबाट बेसी झ-यो
धने बेँसीबाट सदरमुकाम स-यो
मन गर्छ गुमानेको छोरो कतार जान
धनेकी छोरीलाई
अमेरिकाको डीभी प-यो
विश्व–वाष्पीकरणको चपेटामा छन्
अचेल हिमालहरू
सगरमाथाको हिउँले पनि
समुद्रसँग बिहे गर्ने सुर ग-यो
गाउँमै नेपाली पढाउँदै छन् पण्डित बाका छोरा
चौतारीमा मिसाउँदै छन् गाउँलेहरू हाँसोमा हाँसो
बाउको धार्मिक प्रवचन
र छोराको देशप्रेमको कविताले खै के ग-यो ?
३. सीप
भन्दै छ अत्याधुनिक अर्थशास्त्री
हिमालको फोटो बिक्छ
झरनाको फोटो बिक्छ
बिक्ने कुरा कति कति छन्
सुदूर गाउँमा
च्यातिएको चोली
फाटेको टोपी
फुटेका कुर्कुच्चा
कहीँ न कहीँ
कतै न कतै बिक्छ बिक्छ
केही गर्नै पर्दैन धनी हुन उहाँलाई
उहाँसँग हाम्रो देश
र हाम्रो गरिबी बिक्री गर्ने सीप छ ।
४. प्रमाण
कसले भन्छ
कृत्य कुकृत्य देउताले मात्र देख्छ
अरूले देख्दैन
कहाँ पाइन्छ आफूले आफूलाई देखिन भन्न ?
भो नपुच्छनुहोस् ऐनामा धुलो
मान्छेभन्दा नाङ्गो
अरू कुनै जीव नै छैन ।
बोस्टन, अमेरिका ।
