अमरगढी समाचारदाता
डडेल्धुरा, माघ १० गते । चमेलिया जलविद्युत् आयोजनाको तारमुनि जमिन र घर परेका पीडितले मुआब्जा नपाएको भन्दै विद्युतकाे लाइन विस्तारमा अवरोध गरेका छन्।
विद्युतकाे टावर बनाइएको जग्गाको समेत मुआब्जा नपाएपछि अमरगढी नगरपालिका–७, पोखराको भाटागाउँ र कैनी टोलवासीले तार विस्तारमा अवरोध गरेका हुन्। स्थानीय प्रकाश भट्टराईको खेती गर्ने जग्गामा विद्युतकाे टावर निर्माण गरिएको छ। तर, अहिलेसम्म पनि उचित मुआब्जा नपाएको उहाँको गुनासो छ।
उचित मुआब्जा नपाउँदा हाल तार विस्तारमा अवरोध गरेको भट्टराईले बताउनुभयो। भट्टराईको जग्गाको मुआब्जाका लागि १६ हजार रुपियाँ मात्रै मूल्याङ्कन गरिएकाले उहाँले हालसम्म सो रकम बुझ्नुभएको छैन। तारमुनिको जग्गावालालाई ८० हजार रुपियाँसम्म दिएको तर आफ्नो आधा गरामा पूरै टावर बनाए पनि १६ हजार रुपियाँ मात्रै मुआब्जाका लागि मूल्याङ्कन गरिएको उहाँको गुनासो छ।
स्थानीय डम्बर कैनीले हालसम्म मुआब्जाबापतको रकम नै नपाएको गुनासो गर्नुभयो। उहाँले भन्नुभयो, “तारमुनि परेको घर भत्काएँ तर हालसम्म मुआब्जाबापतको रकम नै पाएको छैन।”
मुआब्जाका लागि वडा कार्यालय, नगरपालिका, प्रशासन कार्यालयमा निवेदन दिए पनि हालसम्म कुनै सुनुवाइ नभएको उहाँको दुःखेसो छ। पोखरा क्षेत्रका अधिकांश स्थानीयले मुआब्जा पाए पनि एक दर्जन जति स्थानीय छुटेको पाइएको वडाध्यक्ष खडक बोहराले बताउनुभयो।
जिल्ला प्रशासन कार्यालयले मुआब्जा नपाएकालाई निवेदन दिन आग्रह गरेको छ। प्रमुख जिल्ला अधिकारी मोहनराज जोशीका अनुसार आयोजनाले मुआब्जाका लागि पठाएको रकम फिर्ता गरिएको छ। केही स्थानीयले रकम कम भएको भनी बुझ्न नमान्दा प्रशासन कार्यालयको खातामा जम्मा गरिएको रकम पुनः फिर्ता गरिएको थियो।
२०७४ माघ महिनामा भएको ३० मेगावाट बिजुली क्षमताको सो जलविद्युत् आयोजनाले हाल टावरको दोस्रोतर्फ पनि तार तान्ने काम गरिरहेको छ। एकतर्फी तार तानेर विद्युत् प्रवाह गरिएको थियो भने हाल दोस्रोतर्फ पनि तार तान्ने काम आयोजनाले गरिरहेको छ।
