काठमाडौं, माघ ९ गते । सूर्य नेपाल गल्फ टुर अन्तर्गत सिजनको तेस्रो प्रतियोगिता सूर्य नेपाल एनपिजिए म्याच प्ले मंगलबारदेखि रोयल नेपाल गल्फ क्लबमा हुने भएको छ । यस प्रतियोगितामा सिजन २०२१/२२ को वरीयता अनुसार शीर्ष १६ गल्फरले प्रतिस्पर्धा गर्नेछन् ।
शीर्ष १६ मा रहेका चार गल्फर अनुपस्थित रहेकाले यसपटक २०औँ वरीयतासम्मका खेलाडीलाई समेटिएको आयोजकले जनाएको छ । मंगलबार पहिलो चरणको खेल तथा बुधबार क्वार्टरफाइनलमा खेल हुनेछन् । बिहीबार ३६ होलको फाइनल खेल हुनेछ ।
प्रतियोगिताको विजेताले ६० हजार रुपियाँ पुरस्कार प्राप्त गर्नेछ । यसैगरी उपविजेतालाई ४२ हजार, तेस्रो हुनेलाई ३२ हजार र चौथो हुनेलाई २४ हजार रुपियाँ पुरस्कार प्रदान गरिने छ । क्वार्टरफाइनलबाट बाहिरिने खेलाडीलाई ११ हजार र पहिलो चरणबाट बाहिरिने खेलाडीलाई जनही ६ हजार रुपियाँ प्रदान गरिने बताइएको छ ।
