नेपालगञ्ज समाचारदाता
नेपालगञ्ज, पुस २८ गते । नेपालगञ्ज उपमहानगरसहित बाँकेमा फैलिएको दादुरा रोग सङ्क्रमण नियन्त्रण अभियान तीव्र पारिए पनि फैलिनेक्रम समेत तीव्र देखिएको छ । एक सातामा नेपालगञ्ज र खजुरामा गरेर ११० जनामा दादुरा देखिएको छ । सङ्क्रमित बालबालिको उमेर ६ देखि १५ वर्षसम्म रहेको जिल्ला स्वास्थ्य कार्यालय बाँकेले जनाएको छ । सो कार्यालयका खोप फोकल पर्सन नरेश श्रेष्ठका अनुसार नेपालगञ्जका १०८ र खजुरा गाउँपालिकाका दुई जना बालबालिकामा दादुरा सङ्क्रमण पुष्टि भएको छ ।
अन्य धेरै बालबालिकामा सो रोगसँग मिल्ने लक्षण देखिएकाले परीक्षण भइरहेको छ । दादुरा सङ्क्रमित भेटिन थालेपछि परीक्षण, चेतनामूलक कार्यक्रम, बिरामीको थप खोजी र खोप अभियान तीव्र पारिएको नेपालगञ्ज उपमहानगर स्वास्थ्य महाशाखाका प्रमुख रामबहादुर चन्दले बताउनुभयो ।
हालसम्म ती वडामा चार हजार बालबालिकालाई दादुरा खोप लगाइसकिएको जनाउँदै खोप अभियान तीव्र पारिएको जानकारी उहाँले दिनुभयो । दादुराका सङ्क्रमित भेटिएका नेपालगञ्ज क्षेत्रका छवटा वडामा १० वटा खोप केन्द्र राखेर दादुरा–रुबेलाविरुद्ध खोप अभियान जारी रहेको छ । बाँकेमा दादुरा फैलिएपछि स्वास्थ्य सेवा विभागबाट समेत वरिष्ठ चिकित्सकको एक टोली नेपालगञ्ज पुगेर दादुरा फैलिनुका कारण र नियन्त्रणसम्बन्धी समीक्षा गरिरहेको स्वास्थ्य कार्यालयले जनाएको छ ।
