काठमाडौं, पुस १९ गते । राष्ट्रिय योजना आयोगले ‘प्रमुख आर्थिक सूचकको प्रयोग विधि’ पुस्तक सार्वजनिक गरेको छ ।
पुस्तकबाट आर्थिक तथ्याङ्कको उत्पादन तथा प्रयोग गर्दा अपनाउनुपर्ने वैज्ञानिक विधिको सुनिश्चितता, नागरिकसामु सलर तरिकाले बुझिनेगरी आर्थिक सूचनाहरु प्रवाह गर्दा ध्यान दिनुपर्ने कुराको जानकारी पाइने आयोगको अपेक्षा छ ।
वैज्ञानिक तथ्याङ्कको लेख रचना कसरी गर्ने, तुलनात्मक अध्ययनमा तथ्याङ्क कसरी प्रयोग गर्ने, तथ्याङ्क विश्लेषण र प्रस्तुति कसरी गर्ने भन्ने सन्दर्भमा यस पुस्तिका बढी उपयोगी हुने आयोगले जनाएको छ ।
यस पुस्तकमा सूचना निर्माण गर्दा आवश्यक पर्ने तथ्याङ्कको स्रोत, तयार गर्ने विधि, ध्यान दिनुपर्ने कुरालगायतका विषयलाई वास्तविक तथ्याङ्कमा आधारित उदाहरणसहित व्याख्या गरिएको छ ।
मुख्य रुपमा चार भागमा विभाजन गरिएको यस पुस्तकको पहिलो भागमा तथ्याङ्क संवादात्मक बनाउने विधि, दोस्रो भागमा सङ्ख्यालाई लेखमा रुपान्तरण गर्ने विधि, तेस्रो भागमा प्रमुख आर्थिक सूचकहरुको परिचय र चौथो भागमा सार्वजनिक नीतिका सवालहरुमा तथ्याङ्कको प्रयोगबारे वर्णन गरिएको छ ।
