हिमालयबाट खोसियो भूमिस्थ सेवा

मीनराज भण्डारी

काठमाडौँ, पुस ८ गते । नेपाल नागरिक उड्डयन प्राधिकरणले त्रिभुवन विमानस्थलमा भूमिस्थ सेवा (सेल्फ ग्राउन्ड ह्यान्डलिङ) अनुमति पाएको निजी क्षेत्रको हिमालय एयरलाइन्सको उक्त सुविधा खोसेको छ । प्राधिकरणले हिमालयको नेपाल वायुसेवा निगमलाई दिएको हो । नेवानिले त्रिभुवन अन्तर्राष्ट्रिय विमानस्थलमा लामो समयदेखि स्वदेशी तथा विदेशी हवाई कम्पनीका सबै जहाजको ग्राउन्ड ह्यान्डलिङ गर्दै आएको छ ।

तर प्राधिकरणले यसअघि ग्राउन्ड ह्यान्डलिङ सेवा निर्देशिका, २०७२ को दफा (४) बमोजिम हप्तामा ३५ भन्दा बढी नियमित अन्तर्राष्ट्रिय उडान गर्ने वायुसेवाले आफैँ भूमिस्थ सेवा गर्न पाउने नियमानुसार २०७७ असोज ४ गते हिमालयलाई अनुमति दिएको थियो ।

हिमालयलाई अनुमति दिएपछि त्यसले निगमको मुख्य आम्दानी गुमेको भन्दै यसको आलोचना भएपछि अनुमति स्थगनको अवस्थामा थियो । अनुमति पाएको एक वर्षभित्र ग्राउन्ड ह्यान्डलिङका लागि आवश्यक पर्ने उपकरण खरिद गरी सेवा सुचारु गर्नुपर्ने भए पनि हिमालयले सो कार्य नगरेको भन्दै प्राधिकरणले हिमालयलाई दिएको अनुमति स्थगित गरेर निगमलाई जिम्मेवारी दिएको हो । प्राधिकरणका सूचना अघिकारी ज्ञानेन्द्र भुलका अनुसार निगमको वर्तमान आर्थिक अवस्थालाई ध्यानमा राखी  राष्ट्रिय ध्वजावाहकको संरक्षण गर्नु राज्यको दायित्व भएकाले पछिल्लो निर्णय गरिएको हो ।

उहाँले भन्नुभयो, “प्राधिकरणको पछिल्लो निर्णयले निगमको दैनिक साढे चार लाख रुपियाँभन्दा बढी आम्दानीमा सुधार आउनेछ ।”

हिमालयको ग्राउन्ड ह्यान्डलिङ सेवा अनुमति प्रमाणपत्र तथा त्यसको नवीकरण कार्य अर्काे निर्णय नभएसम्म प्राधिकरणको मङ्सिर ४ गतेको निर्णयअनुसार स्थगन भएको उहाँले बताउनुभयो । त्रिभुवन अन्तर्राष्ट्रिय विमानस्थलसँगै भैरहवास्थित गौतम बुद्व अन्तर्राष्ट्रिय विमानस्थल र सञ्चालनको तयारीमा रहेको पोखरा क्षेत्रीय अन्तर्राष्ट्रिय विमानस्थलको ग्राउन्ड ह्यान्डलिङ सेवासमेत निगमले नै गर्ने उहाँको भनाइ छ ।

हिमालयले प्राधिकरणको ऐन नियमअनुसार नै अनुमति पाएको र प्राधिकरणको पछिल्लो निर्णयले कम्पनीले सामान्य कानुनी अधिकारसमेत प्रयोग गर्न नपाएको एयरलाइन्सका उपाध्यक्ष विजय श्रेष्ठले बताउनुभयो । उहाँले भन्नुभयो, “वैदेशिक लगानी ऐनमा स्वदेशी र विदेशी कम्पनीलाई विभेद गर्न नपाइने उल्लेख भए पनि नेपालको ऐन, नियम, उपनियम, विनियम र कार्यविधिअनुसार दिएको निर्णय प्राधिकरणले खोसिदिएको छ । हिमालयले आफ्नो ग्राउन्ड ह्यान्डलिङ आफैँ गर्ने तयारीअनुसार खरिद गरिएका उपकरणको नोक्सानी कसले बेहोर्ने ?”