सुदूरपश्चिमकी एक्ली महिला सांसद

धनगढी समाचारदाता

धनगढी, मङ्सिर १४ गते । सुदूरपश्चिम प्रदेशबाट प्रतिनिधि सभा सदस्यमा उम्मेदवार रहेका ११ महिलामध्ये एक जना मात्रै निर्वाचित हुनुभएको छ। मङ्सिर ४ गते सम्पन्न निर्वाचनमा नागरिक उन्मुक्ति पार्टीका अध्यक्ष रञ्जिता श्रेष्ठ चौधरी विजयी हुनुभएको हो। उम्मेदवार भएका अन्य सबै महिला नेत्री पराजित हुनुभएको थियो। प्रदेशभरिबाट जम्मा १३७ जनाको उम्मेदवारी परेको थियो। जसमध्ये ११ जना उम्मेदवार महिला (८ प्रतिशत) हुनुहुन्थ्यो। नागरिक उन्मुक्ति पार्टीका अध्यक्ष चौधरीले कैलाली–१ बाट विजयी हुनुभएको हो।

उहाँले १२ हजार ३२३ मतान्तरले निकटतम प्रतिस्पर्धी नेपाली कांग्रेसका रामजनम चौधरीलाई पराजित गर्नुभएको हो। विजयी चौधरीले ३० हजार ४०४ मत प्राप्त गर्नुभएको छ। पराजित चौधरीले १८ हजार ८१ मत पाउनुभयो। निर्वाचनका लागि नेकपा (एमाले), माओवादी केन्द्रसहित विभिन्न राजनीतिक दलले महिलालाई उम्मेदवार बनाएका थिए। यसैगरी केही महिला स्वतन्त्रबाट प्रतिनिधि सभा सदस्यको निर्वाचन लड्नुभएको थियो। तर पूर्वमन्त्रीदेखि लिएर चर्चित नेत्रीहरूको पराजय भएको छ। एक महिला नेत्रीले भारी मतान्तरले जित हात पार्दा अरू महिला नेत्रीको पराजय भएको छ। 

निर्वाचन आयोगका अनुसार पूर्वमन्त्रीसमेत रहनुभएकी नेकपा (माओवादी केन्द्र)का नेत्री बिना मगर कञ्चनपुर–१ मा नेकपा (एमाले)का तारा लामा तामाङसँग पाँच हजार ५४३ मतान्तरले पराजित हुनुभएको थियो। दोस्रो स्थानमा चित्त बुझाउनुभएकी मगरले १९ हजार चार सय मत प्राप्त गर्नुभयो। विजयी लामाले २४ हजार ९४३ मत पाउनुभएको थियो। 

कञ्चनपुर–३ मै अर्का चर्चित महिला नेत्री एवं निवर्तमान सांसद निरुदेवी पाल पराजित हुनुभएको छ। नेकपा (एमाले)की उहाँ नेपाली कांग्रेसका नेता एवं पूर्वमन्त्री रमेश लेखकसँग १२ हजार ९० मतान्तरले पराजित हुनुभयो। पालले १८ हजार ४८५ मतमा चित्त बुझाउँदा लेखकले ३० हजार ५७५ मत पाउनुभयो। 

कञ्चनपुरमा निर्वाचन क्षेत्र नं. १ मा तीन र २ मा चार गरेर सात महिलाले प्रतिनिधि सभा सदस्यका लागि चुनावी प्रतिस्पर्धा गर्नुभएको थियो। १ मा पराजित नेपाल मजदुर किसान पार्टीका नन्दादेवी जोशीले ९५ र स्वतन्त्र हरिनादेवी भट्टले ६७ मत प्राप्त गर्नुभयो। 

त्यस्तै कञ्चनपुर–२ मा स्वतन्त्रबाट चुनाव लड्नु भएकी अधिकारकर्मी शारदादेवी चन्दले ७४१, जनमत पार्टीका सुशीलादेवी विष्टले १३१ र नेपाल मजदुर किसान पार्टीका जानकीदेवी गिरीले १०६ मतमा चित्त बुझाउनुभयो। डोटीमा नेकपा (एमाले)का नेत्री गौरी ओली चार हजार २०६ मतान्तरले नेकपा (एकीकृत समाजवादी) नेता एवं पूर्वमन्त्री आलेसँग पराजित हुनुभएको छ। ओलीले २३ हजार ४ मत पाउनुभयो। विजयी आलेले भने २७ हजार २१० मत प्राप्त गर्नुभएको छ। 

कैलालीबाट तीन जना महिला चुनावी प्रतिस्पर्धामा उत्रिनुभएको थियो। एक महिला नेत्रीको शानदार जित हुँदा दुई महिलाको हार भएको छ। क्षेत्र नं. ३ बाट चुनावी प्रतिस्पर्धा गर्नुभएकी नेपाल मजदुर किसान पार्टीका गङ्गादेवी पौडेलले १६१ मत प्राप्त गरेर सबैभन्दा पुछारमा चित्त बुझाउनुभयो। यस्तै सोही पार्टीबाटै कैलाली–५ मा चुनावी प्रतिस्पर्धा गर्नुभएकी नन्दाकुमारी दर्लामी मगर (राना) ले ४२ मत मात्रै प्राप्त गर्नुभयो। उहाँले पनि अन्तिममा चित्त बुझाउनुपरेको छ। 

यो प्रदेशमा प्रतिनिधि सभाको प्रत्यक्षतर्फ नेपाली कांग्रेस र नेकपा (एकीकृत समाजवादी)ले महिलालाई टिकट दिएका थिएनन्। यसैगरी कैलाली–२, ४ सहित अछाम, डडेल्धुरा, बैतडी, बझाङ, दार्चुलामा पुरुष मात्रै उम्मेदवार रहनुभएको थियो। यस्तै मतगणना बाँकी रहेको बाजुरामा पनि प्रतिनिधि सभा सदस्यका लागि पुरुष मात्रै उम्मेदवार रहनुभएको छ। 

यस्तै प्रदेश सभामा पनि मुख्य नेकपा (एमाले)का कमला ओली पराजित हुनुभएको छ। उहाँ कैलाली क्षेत्र नं. २ (क)बाट पराजित हुनुभएको हो। उहाँले सो क्षेत्रमा तेस्रो मत पाउनुभयो।