मुगुको मतगणना अनिश्चित

हरिकृष्ण ऐडी
मुगु, मङ्सिर ६ गते । मतदान केन्द्रबाट मतपेटिका आउन ढिलाइ हुँदा मुगुमा मतगणना अनिश्चित बनेको छ । जिल्लाको माथिल्लो मुगुको मतदान केन्द्रबाट मतपेटिका जिल्लाको मुख्य निर्वाचन कार्यालयमा नआइपुगेकाले मतगणना अनिश्चित बनेको हो ।

जिल्लाको छायाँनाथ रारा नगरपालिका, सोरु गाउँपालिका र खत्याड गाउँपालिकाका सबै मतदान केन्द्रबाट आज (मङ्गलबार) बिहानसम्म आइपुगेको मुख्य निर्वाचन कार्यालयका अधिकृत दिलकुमार बर्देवाले जानकारी दिनुभयो ।

मुगमकार्मारोङ गाउँपालिकाको माथिल्लो मुगु र डोल्फु मतदान केन्द्र जिल्लाभन्दा टाढा भएकाले उक्त मतदान केन्द्रका मतपेटिका आज बेलुकासम्म आइपुगेमा सम्बन्धित सर्वदलीय बैठक पश्चात् आज रातिदेखि मतगणना सुरु हुनसक्ने उहाँको भनाइ छ ।