विश्वव्यापी चुनौती सामनाका लागि ऐक्यबद्ध हुन अपिल

बाली, इन्डोनेसिया, कात्तिक २९ गते । संयुक्त राष्ट्रसङ्घ महासचिव एन्टोनियो गुटरेसले विश्वमा हाल देखा परिरहेका साझा र विश्वव्यापी चुनौती सामनाका लागि ऐक्यबद्ध हुन अपिल गर्नुभएको छ । विश्वमा पछिल्लो समयमा विभिन्न समस्याहरू देखिएकाले ती समस्या तथा चुनौतीको समाधानका लागि विश्वका नेता एकताबद्ध भएर लाग्नुपर्नेमा उहाँले जोड दिनुभएको हो ।

इन्डोनेसियाको बालीमा आजदेखि हुन लागेको ग्रुप अफ ट्वान्टी (जि २०) सम्मेलनको पूर्वसन्ध्यामा उहाँले सो समूहका नेताहरूलाई उक्त अपिल गर्नुभएको हो । जलवायु परिवर्तनका कारण उत्पन्न समस्या मानव जीवनका निम्ति एक प्रमुख चुनौतीका रूपमा देखिएकाले जलवायु परिवर्तनका असर कम गर्न तथा त्यसको प्रभावबाट विश्वलाई बचाउन सबै लाग्नुपर्ने बताउनुभयो ।

जलवायु परिवर्तनका कारण उत्पन्न समस्या समाधानका लागि जि२० समूहका देशले महत्त्वपूर्ण भूमिका निर्वाह गर्नसक्ने बताउँदै उहाँले स्वास्थ्य, शिक्षा, लैङ्गिक समानता, नवीकरणीय ऊर्जालगायत क्षेत्रमा समूहले लगानी गर्नुपर्ने सुझाव दिनुभयो ।

महासचिव गुटरेसले जलवायु परिवर्तनको असर कम गर्न राष्ट्रसङ्घले अघि सारेको ‘एजेन्डा’ तथा सम्झौता कार्यान्वयनमा इमानदार बन्न आग्रह गर्नुभयो । रासस/सिन्ह्वा