डडेल्धुरा, कात्तिक १८ गते । नेपाली कांग्रेसका सभापति एवम्
प्रधानमन्त्री शेरबहादुर देउवाले अतिक्रमित नेपालको भूमि कूटनीतिक पहल र आपसी
सम्बन्धका आधारमा फिर्ता ल्याउन पहल भइरहेको बताउनुभएको छ ।
गृहपालिका गन्यापधुरा–२ वडालमा शुक्रबार आयोजित चुनावी सभालाई सम्बोधन गर्दै उहाँले आफू पनि सुदूरपश्चिमवासी भएकाले लिम्पियाधुरा, लिपुलेक, कालापानी र अन्य भूमिसम्बन्धी विवाद पनि कूटनीतिक पहलका आधारमा समाधान गर्ने स्पष्ट पार्नुभयो ।
लोकतन्त्र र संविधानको रक्षाका लागि
गठबन्धन गरी एक ठाउँमा उभिनु परेको बताउँदै उहाँले प्रतिनिधिसभा र प्रदेशसभा
निर्वाचनमा नेपाली कांग्रेससहितको गठबन्धन बहुमतका साथ विजयी हुने दाबी गर्नुभयो
।
सभापति
देउवाले सबै पक्ष, जातजाति र भूगोल तथा अन्यायमा परेका
मानिसको पक्षमा रहेका गठबन्धनका उम्मेदवारलाई विजयी बनाउन आग्रह गर्नुभयो ।
राजनीतिमा स्थायी शत्रु र मित्र नहुने भएकाले राजनीति परिस्थितिअनुसार चल्ने
उहाँको भनाइ छ ।
प्रधानमन्त्री
देउवाले न्यायपालिका स्वतन्त्र हुनुपर्नेमा जोड दिँदै न्यायालिकामाथिको हस्तक्षेप
र आरोप बन्द हुनुपर्ने बताउनुभयो ।
नेकपा (एमाले) का अध्यक्ष केपी शर्मा
ओलीले प्रधानमन्त्री हुँदा न्यायालय र संविधाननलाई कमजोर पार्ने चेष्टा गरेको आरोप
लगाउँदै प्रधानमन्त्री देउवाले न्याय क्षेत्रलाई स्वतन्त्ररूपमा काम गर्ने वातावरण
आफ्नो नेतृत्वको सरकारले कायम गरेको बताउनुभयो ।
कुनै पनि व्यक्ति वा प्रधानमन्त्रीले संसद भङ्ग गर्न नपाउन भन्ने अभिप्रायले लोकतन्त्रको मर्म र जनताको अभिमतका आधारमा तयार पारिएको नेपालको संविधान मास्ने र च्यात्ने खतरा बढेको तर ससंद र अदालत नै संविधानको रक्षा गर्ने निकाय भएको उहाँको भनाइ थियो ।
प्रधानमन्त्री शेरबहादुर देउवे गृहपालिका गन्यापधुरा–२ मा स्वागत गर्दै स्थानीइ बासिन्दा ।
प्रधानमन्त्री देउवाले सुदूरपश्चिम र डडेल्धुराको विकासका लागि आफू सधैँ प्रतिबद्ध रहेको स्पष्ट गर्नुभयो । डडेल्धुरामा मेडिकल कलेज निर्माणको प्रक्रिया अगाडि बढिसकेको जानकारी दिँदै उहाँले पश्चिम सेती जलविद्युत् आयोजना, विमानस्थल, ग्रामीण सडकको स्तरोन्नति, सिँचाइ, खानेपानी र विद्यालय निर्माणजस्ता विकासका गतिविधि यस क्षेत्रमा अगाडि बढेको बताउनुभयो ।
प्रधानमन्त्री देउवाले कात्तिक १९ गते बिहान अजयमेरु गाउँपालिकाको भद्रपुर र दिउँसो भागेश्वर गाउँपालिकाको रुपाल तथा २० गते आलिताल गाउँपालिकाको गोदाम र परशुराम नगरपालिकाको जोगबुढामा गठबन्धनले आयोजना गर्ने चुनावी सभालाई सम्बोधन गर्ने कार्यक्रम छ । रासस
