गोरखापत्र अनलाइन
काठमाडौं, कात्तिक ११ गते । निर्वाचन आयोगले उम्मेदवारहरूको चुनिन पाउने अधिकार नै हनन् हुनेगरी सामाजिक सञ्जालको प्रयोग नगर्न सचेत गराएको छ । सामाजिक सञ्जाल प्रयोगकर्ताले समूह नै बनाएर आगामी प्रतिनिधिसभा र प्रदेशसभाका उम्मेदवारहरूको चुनिन पाउने अधिकार हनन् हुनेखालका सामग्रीहरू पोष्ट गरिरहे भन्दै आयोगको यस्तो भनाइ आएको हो ।
कसैप्रति लाञ्छना लगाउने, कसैप्रति दुराग्रहपूर्ण अभिव्यक्ति दिने अथवा निर्वाचनमा उठेका उम्मेदवारको चुनिने अधिकार हनन् हुनेगरी सामाजिक सञ्जालको प्रयोग नगर्न सचेत गराइएको आयोगका प्रवक्ता शालिग्राम शर्मा पौडेलले बताउनुभयो । उहाँले उम्मेदवारलाई चुनिन पाउने अधिकारबाट वञ्चित गराउन नहुने स्पष्ट पार्नुभयो ।
आम मतदातालाई चुन्ने अधिकार भएजस्तै उम्मेदवारलाई चुनिन पाउने अधिकार हुने भएकाले त्यसलाई हनन् गर्न नमिल्ने उहाँको भनाइ छ । आयोगका प्रवक्ता पौडेलले भन्नुभयो, ‘आयोगले आचारसंहिता जारी गरेको छ । आयोगले सामाजिक सञ्जालसम्बन्धी नीति पनि जारी गरेको छ । आयोगलाई प्रचलित, कानुन, ऐन, नियमका बारेमा पनि ज्ञान छ । यी सबै विषयलाई मध्यनजर गरेर निर्वाचनलाई स्वच्छ, स्वतन्त्र, निष्पक्ष र भयरहित वातावरणमा सम्पन्न गर्न आचारसंहितामा उल्लेखित विषयहरू सबैले पालना गर्नुपर्छ ।’
कसैप्रति लाञ्छना लगाउने, कसैप्रति दुराग्रहपूर्ण अभिव्यक्तिहरू प्रसारण गर्ने विषयहरू अभिव्यक्ति स्वतन्त्रता भित्र नपर्ने उहाँको भनाइ छ । कसैको चरित्रहत्या गर्ने, कसैका विपक्षमा गलत अभिव्यक्तिहरू निकाल्ने, उम्मेदवारहरूका तस्बिरमा गलत चिन्ह लगाउने लगायतका विषयले अरूको अधिकार हनन् हुन्छ भन्ने कुरामा आयोगको ध्यानाकर्षण भएको उहाँले बताउनुभयो ।
आयोगले उम्मेदवारहरूमाथि गालीगलौज नगर्न, चरित्र हत्या गर्ने, अवहेलना गर्ने लगायतका अभिव्यक्ति नदिन पनि सम्बन्धित सबै पक्षलाई पुनः निर्देश गरेको उहाँले बताउनुभयो । आयोगका प्रवक्ता पौडेलले छद्म नामबाट कसैले पनि उम्मेदवारहरूको चरित्र हत्या गर्न नपाउने बताउनुभयो ।
सीमाभित्र बसेर मात्रै निर्वाचनमा खर्च गर्न पनि उम्मेदवारहरूलाई आयोगले सचेत गराएको उहाँले बताउनुभयो । सम्बन्धित टेक कम्पनीहरूसँग सम्पर्कमै रहेकाले उनीहरूले सामाजिक सञ्जालमा गरेको खर्चको विवरण समेत लिइरहेको आयोगले जनाएको छ । आयोगका प्रवक्ता पौडेलले भन्नुभयो, ‘निर्वाचन आचारसंहिता २०७९ मा उम्मेदवार, राजनीतिक दल र आचारसंहिताले निषेध गरेका बाहेकका अन्य व्यक्तिहरूले प्रचारप्रसार गर्न पाइन्छ । उम्मेदवार वा राजनीतिक दलको पक्षमा मत माग्ने राइट पनि रहन्छ । तर त्यसको निश्चित सीमा हुन्छ । अभिव्यक्ति स्वतन्त्रता भनिरहँदा त्यसको भाषाशैली, त्यसले अर्कालाई गर्ने गालीगलौज, चरित्रहत्या, अवहेलना यी विषयहरूप्रति आयोगको गम्भीर ध्यानाकर्षण भएको हो ।’
निर्वाचन आयोगले निर्वाचनलाई स्वच्छ, स्वतन्त्र र भयरहित वातावरणमा सम्पन्न गर्नका लागि आचारसंहिता जारी गरेको उल्लेख गर्दै त्यसका कडाइका साथ पालना राजनीतिक दल र त्यसका उम्मेदवारहरूको ध्यानाकर्षण गराउँदै आएको छ ।
-original-thumb.jpg)
