दिवाकर पोख्रेल
देउखुरी, असोज २६ गते । दाङमा प्रतिनिधि सभा निर्वाचनका लागि तीनवटै निर्वाचन क्षेत्रमा महिला नेत्रीहरू माथिल्लो तहका नेतासँग भिड्दै छन्। ठूला दलमध्येबाटै दाङमा तीनवटै निर्वाचन क्षेत्रमा महिला उम्मेदवार छन्।
निर्वाचन क्षेत्र नं. १ मा नेकपा एकीकृत समाजवादीका नेता तथा सहरी विकासमन्त्री मेटमणि चौधरीसँग नेकपा एमालेकी नेत्री शान्ता चौधरी भिड्दै हुनुहुन्छ। मन्त्री चौधरी गठबन्धनतर्फबाट उम्मेदवार बन्नुभएको हो।
देउखुरी उपत्यका र दाङ घोराही उपत्यकाको रामपुर, धर्नालगायत क्षेत्र नं. १ थारू समुदायको बाहुल्य रहेको क्षेत्र हो। स्थानीय तह निर्वाचनमा देउखुरी क्षेत्रका चारवटै पालिकामा एमालेले एउटा पालिकामा पनि जित्न सकेन। क्षेत्र नं. १ का पालिकामध्ये दुईवटा पालिकामा नेकपा माओवादी केन्द्र र दुईवटा पालिकामा नेपाली कांग्रेसले जित हात पारेका छन्।
यसबाट पनि शान्ता चौधरीलाई मेटमणि चौधरीसँग भिड्न सजिलो छैन। नेकपा एमालेमै रहेर टिकट नपाएपछि गङ्गा थारू हाम्रो नेपाली पार्टीबाट प्रतिनिधि सभामा उम्मेदवार बन्नु भएपछि शान्ता चौधरीकै मत काटिने अनुमान गरिएको छ।
यसैगरी दाङको निर्वाचन क्षेत्र नं. २ मा उच्च नेतृत्व (हेभी वेट) नेता नेकपा एमालेका महासचिव शङ्कर पोखरेलसँग नेकपा माओवादीकी नेत्री पूर्वमन्त्री रेखा शर्मा भिड्दै हुनुहुन्छ। लुम्बिनी प्रदेशका मुख्यमन्त्रीसमेत बन्नुभएका पोखरेल एमालेका वैचारिक नेतामा पर्नुहुन्छ।
उक्त निर्वाचन क्षेत्रको पहाडी क्षेत्र बङ्गलाचुलीमा स्थानीय तह निर्वाचनमा गठबन्धन विजयी भएको थियो। माओवादीका उपाध्यक्ष तथा पूर्वसभामुख कृष्णबहादुर महराले छाडेपछि उम्मेदवार बन्ने अवसर पाउनुभएकी रेखा शर्मालाई पनि एमाले महासचिव पोखरेललाई हराउन सहज भने छैन।
दाङ निर्वाचन क्षेत्र नं. ३ मा एमालेतर्फबाट एमाले नेत्री एवं गायिका कोमल वलीले पूर्वसिँचाईमन्त्री तथा कांग्रेसका प्रभावशाली नेता दीपक गिरीको सामना गर्नुपर्ने भएको छ।
त्यस क्षेत्रमा चारवटा पालिका रहेका छन्। जसमा स्थानीय तह निर्वाचनमा तीनवटा पालिकामा कांग्रेसले जित हात पारेको छ। तुलसीपुर उपमहानगरपालिकामा नेकपा एमाले विजयी भएको छ।
