धनगढी समाचारदाता
धनगढी, वैशाख १९ गते । सुदूरपश्चिम प्रदेश सरकारले प्रदेश सभा सचिवालयमा दर्ता गरेका दुई विधेयक एक वर्षदेखि सचिवालयमै थन्किएका छन् ।
सभा सञ्चालन भए पनि पुरानो दर्ता भएका विधेयक अगाडि नबढाइँदा टीकापुर विज्ञान तथा प्रविधि विश्वविद्यालय सम्बन्धमा व्यवस्था गर्न बनेको विधेयक र बडघर/भलमनसा प्रथा संरक्षण तथा विकास सम्बन्धमा व्यवस्था गर्न बनेको विधेयक सचिवालयमै थन्किएका छन् । यी दुई विधेयक सचिवालयमा दर्ता भएको एक वर्ष भइसकेको छ ।
प्रदेश सरकारले टीकापुर विज्ञान तथा प्रविधि विश्वविद्यालय सम्बन्धमा व्यवस्था गर्न बनेको विधेयकलाई, २०८१ चैत ३ गते प्रदेश सभा सचिवालयमा दर्ता गरेको थियो । त्यसै गरी बडघर/भलमनसा प्रथा संरक्षण तथा विकास सम्बन्धमा व्यवस्था गर्न बनेको विधेयकलाई सरकारले २०८२ जेठ २१ गते प्रदेश सभा सचिवालयमा दर्ता गरेको थियो । विगतमा धेरै पटक बिजनेस अभावको पीडा भोगेको प्रदेश सभाले यी दुई विधेयकलाई भने एक वर्षदेखि अगाडि बढाउन सकेको छैन ।
विधेयक अगाडि नबढाइएकोप्रति सत्तारूढ दल नेपाली कांग्रेसले असन्तुष्टि प्रकट गरेको छ । मुख्यमन्त्री कमलबहादुर शाहको अध्यक्षतामा बसेको सो पार्टीकोे दलको बैठकले यी दुवै विधेयकलाई प्रदेश सभामा अविलम्ब अगाडि बढाउन सभामुख भीमबहादुर भण्डारीलाई आग्रह गर्ने निर्णय गरेको छ ।
संसद् सचिवालयमा दर्ता भएको एक वर्ष बितिसक्दा पनि ती विधेयक सदनमा प्रस्तुत नहुँदा छलफल पनि हुन सकेको छैन । यस अवस्थाले संसद्को कार्यप्रणालीमाथि नै प्रश्न उठ्ने भन्दै संसदीय दलले ती विधेयक अविलम्ब सदनमा पेस गरी आवश्यक छलफल अगाडि बढाउन सभामुखलाई आग्रह गरेको छ ।
दलका प्रमुख सचेतक विक्रमसिंह धामीले दुवै विधेयक सभामा पेस भए छलफललगायतका कार्य अगाडि बढ्ने भएकाले चाँडै सभामा लैजान आग्रह गर्ने बताउनुभयो । उहाँले भन्नुभयो, “दुइटै विधेयकमा ढिला भइरहेको छ । सभामा पेस भएमा कम्तीमा छलफल भएर प्रक्रिया त अगाडि बढ्थ्यो ।”
आन्तरिक मामिला तथा कानुनमन्त्री हिरा सार्कीले भने दुवै विधेयक सदनमा पेस भई विचाराधीन अवस्थामा रहेको जानकारी दिनुभयो । उहाँले भन्नुभयो, “सभाको बैठक बसेपछि अब त्यसमाथि छलफल होला ।”
