सर्लाही, फागुन ११ गते । नेपाली कांग्रेसका सभापति तथा सर्लाही क्षेत्र नं. ४ का प्रतिनिधि सभा सदस्य गगनकुमार थापाले आफ्नो चुनावी प्रतिज्ञापत्र सार्वजनिक गर्नु भएको छ ।
पार्टीको केन्द्रीय प्रतिज्ञापत्र सार्वजनिक भएको केही दिनपछि सभापति थापाले स्थानीय पूर्वाधार सुधारदेखि शिक्षा, स्वास्थ्य, कृषि, रोजगारी, महिला सशक्तीकरण र बाढी नियन्त्रणसम्मका कार्यक्रमलाई प्राथमिकतामा राख्दै क्षेत्रगत योजना सार्वजनिक गर्नु भएको हो ।
थापाले मतदातालाई सम्बोधन गर्दै मधेसको माटो लोकतान्त्रिक आन्दोलनको महत्त्वपूर्ण आधारभूमि रहेको उल्लेख गर्दै मधेसका मुद्दालाई राष्ट्रिय प्राथमिकतामा राख्ने प्रतिबद्धता जनाउनु भएको छ ।
आफू सर्लाही आउनुअघि ‘हुलाकी राजमार्ग संवाद’ कार्यक्रमका क्रममा यहाँका गाउँबस्तीमा पुगेको बताउँदै थापाले सो क्रममा अलपत्र पुल, डुबानको समस्या, कमजोर सडक तथा आधारभूत सेवाको अभावजस्ता समस्याहरू नजिकबाट देखेको घोषणापत्रमा उल्लेख छ । विभिन्न समुदायका नागरिकसँगको छलफलपछि स्थानीय समस्या समाधानका लागि योजना तयार गरिएको हो ।
स्थानीय नागरिकबाट पुल निर्माण, बाँध मर्मत, डुबान नियन्त्रण, सडक, नहर, ढल निकास, खानेपानी, सिँचाइ र कृषि भण्डारणलगायतका समस्या बारम्बार उठेको उल्लेख गर्दै सभापति थापालेले सङ्घ, प्रदेश र स्थानीय सरकारसँग समन्वय गरेर समाधान खोज्ने प्रतिबद्धता व्यक्त गर्नुभएको छ । उहाँले विभिन्न नौ ओटा अभियानलाई बुँदागत रूपमा समेट्दै प्रतिज्ञापत्र सार्वजनिक गर्नु भएको छ ।
सभापति थापाले “कापी कलम अभियान” अन्तर्गत गणित, विज्ञान र अङ्ग्रेजी शिक्षकको व्यवस्था, विद्यालयलाई प्रविधिमैत्री बनाउने, विपन्न तथा दलित समुदायका विद्यार्थीलाई छात्रवृत्ति दिने, मातृभाषामा शिक्षा सुनिश्चित गर्ने र प्राविधिक शिक्षा विस्तार गर्ने योजना सार्वजनिक गर्नु भएको छ । छोरीहरूको शिक्षालाई प्रोत्साहन गर्न ‘सबल छोरी अभियान’ सञ्चालन गरिने जनाइएको छ ।
“सुलभ स्वास्थ्य–स्वस्थ नागरिक अभियान” अन्तर्गत स्थानीय स्वास्थ्य संस्थामा जनशक्ति र पूर्वाधार विस्तार, प्रत्येक स्थानीय तहमा स्वास्थ्य प्रवर्द्धन केन्द्र स्थापना, सर्पदंश तथा कालाजारको निःशुल्क उपचार, मोबाइल क्लिनिक सेवा, कुपोषण न्यूनीकरण कार्यक्रम र लागुऔषध विरुद्ध अभियान सञ्चालन गर्ने योजनामा उल्लेख छ । साथै आधुनिक उपकरणसहित मधेश मिर्गौला उपचार केन्द्र स्थापना गर्ने लक्ष्य पनि घोषणामा समावेश छ ।
“कृषि उत्थान, किसान गौरव अभियान” अन्तर्गत उखु बक्यौता भुक्तानी, मल र बिउको सहज उपलब्धता, शीतभण्डार निर्माण, न्यूनतम समर्थन मूल्य सुनिश्चित गर्ने र कृषि उद्यमका लागि सहुलियत ऋण उपलब्ध गराउने योजना रहेका छन् । उहाँले सर्लाहीमा आपत्कालीन मल भण्डार स्थापना र मल कारखाना मधेशमा ल्याउन पहल गर्ने प्रतिबद्धता पनि जनाइएको छ।
बाढी र डुबान समस्या समाधानका लागि बागमती नदी क्षेत्रमा पक्की तटबन्ध निर्माण, मनुस्मरा नहर बाँध मर्मत, ‘अर्ली वार्निङ’ प्रणाली, वृक्षारोपण र पानी संरक्षण कार्यक्रम सञ्चालन गर्ने योजना छन् । चुरे संरक्षण र जल सङ्कट निवारण अभियान सञ्चालन गरिने छ।
“मिसन रोजगारी अभियान” अन्तर्गत सीप विकास मेला, रोजगार सूचना केन्द्र स्थापना, युवा उद्यमशीलता प्रवर्द्धन, वैदेशिक रोजगारमा जाने युवालाई सहजीकरण तथा विदेशबाट फर्केका युवालाई उद्यममा जोड्ने कार्यक्रम सञ्चालन गरिने छन् ।
भारतसँग जोडिएको करिब ३० किलोमिटर सीमा क्षेत्रमा “दशगजा उज्यालो अभियान” सञ्चालन गरिने छन् । यसअन्तर्गत सीमा क्षेत्रमा ‘हाई–मास्ट’ सौर्य बत्ती जडान, छोटी भन्सार व्यवस्थित गर्ने तथा सीमावर्ती गाउँमा विशेष विकास प्याकेजमार्फत योजनाहरू कार्यान्वयन गर्ने योजना रहेका छन् ।
महिलाका लागि सहुलियत कर्जा, घरेलु हिंसा र बालविवाह विरुद्ध अभियान, दलित समुदायका लागि शिक्षा र रोजगारी कार्यक्रम तथा स्थानीय भाषा, कला, संस्कृति र धार्मिक स्थल संरक्षणका कार्यक्रम पनि प्रतिज्ञापत्रमा समेटिएका छन् ।
नागरिकका समस्या प्रत्यक्ष सुन्न र समाधान गर्न क्षेत्रमै “जनता दलान” नामक सांसद कार्यालय स्थापना गर्ने उल्लेख छ । उहाँले सुशासन र समुन्नतिका लागि आफूलाई समर्थन गर्न मतदातासँग आग्रहसमेत गर्नुभएको छ ।
