लक्ष्मी चौधरी
जनकपुरधाम, माघ २२ गते । उज्यालो नेपाल पार्टीका अध्यक्ष तथा सुशीला कार्की नेतृत्व सरकारका पूर्व मन्त्री कुलमान घिसिङले आफूहरूले अहिलेसम्म काम गरेर नतिजा दिएको र आगामी दिनमा पनि निरन्तर ‘डेलिभरी’ दिने दाबी गर्नुभएको छ ।
बिहीबार जनकपुरधामस्थित जानकी मन्दिर दर्शनका लागि आउनुभएका अध्यक्ष घिसिङले सञ्चारकर्मीसँग संक्षिप्त कुराकानी गर्दै पार्टी छोटो समयमै स्थापना भए पनि अग्र्यानिक रूपमा अगाडि बढिरहेको बताउनुभयो । उहाँले भाषणभन्दा कामलाई प्राथमिकता दिने पार्टीको नीति रहेको उल्लेख गर्नुभयो ।
“प्रधानमन्त्री भाषण गरेर होइन, जनताले छानेर बन्ने हो,” उहाँले भन्नुभयो, “हामी आफै नेतृत्व गर्न र परिवर्तन ल्याउन राजनीतिमा आएका हौं ।” देशको समग्र क्षेत्रमा उज्यालो ल्याउने उद्देश्यसहित राजनीतिक क्षेत्रको दुर्गन्ध हटाएर स्वच्छ राजनीति स्थापित गर्ने आफ्नो लक्ष्य रहेको उहाँको भनाइ थियो ।
अध्यक्ष घिसिङले देशलाई आर्थिक रूपमा समृद्ध बनाउँदै रोजगारी सिर्जना गर्ने योजना पार्टीको मुख्य एजेन्डा रहेको उल्लेख गर्नुभयो । “पहिले पनि सेवा गरेका छौँ, आगामी दिनमा पनि जनताका पक्षमा काम गर्ने खालका परिवर्तन ल्याउने छौँ,” उहाँले भन्नुभयो । जनताले समर्थन गरे आफूहरू नै प्रधानमन्त्री बनेर देशको नेतृत्व गर्ने दाबी पनि उहाँले गर्नुभयो ।
जनकपुरधाममा भेटघाट कार्यक्रम सम्पन्न गरेपछि अध्यक्ष घिसिङ नेपालको पूर्वी जिल्लातर्फ प्रस्थान गर्ने कार्यक्रम रहेको पार्टीकी केन्द्रिय सदस्य मनिषकुमार साहले बताउनुभयो ।
-square-thumb.jpg)
-original-thumb.jpg)
