अर्जुन काफ्ले
स्याङ्जा, माघ १६ गते । प्रथम खुमा अर्याल टी–२० रनिङ कप क्रिकेटको उपाधि गल्याङ नगरपालिकाले जितेको छ ।
खुमा फाउन्डेसलने आयोजना गरेको प्रतियोगितामा गल्याङले वालिङ नगरपालिकालाई १० विकेटले पराजित गर्दै उपाधि आफ्नो पोल्टामा पारेको हो ।
वर्षाका कारण सात ओभरमा झारिएको खेलमा टस हारेर पहिला ब्याटिङ गरेको वालिङले निर्धारित ओभरमा ३९ रन बनाएको थियो ।
वालिङबाट सुजन गौतमले १० रन बनाए पनि अरूले दोहोरो अङ्क बनाउन सकेनन् भने गल्याङबाट तुलसीहरि भण्डारी र इसान पाण्डेले दुई दुई विकेट लिनुभयो ।
४० रनको लक्ष्य पाएको गल्याङले ३.१ ओभरमा कुनै विकेट नगुगाई लक्ष्य भेटाएको हो । गल्याङबाट दीपकप्रसाद पाण्डेले २३ र इसान पाण्डेले १३ रन बनाउनुभएको थियो ।
यहाँ एनपिएलका सन्दिप क्षेत्री, राष्ट्रिय खेलाडी इसान पाण्डे, दिपक प्रसाद डुम्रे, विपीन खत्री जस्ता खेलाडीले भरिएको टिम गल्याङले जित निकालेको हो । उपाधि जितेको गल्याङले सुन र हिरा जडित रनिङ सिल्ड, दुई लाख रुपियाँ, कप, मेडल र प्रमाणपत्र हात पारेको छ ।
उपविजेतमा वालिङले एक लाख ५० हजार रुपियाँसहित ट्रफी, मेडल र प्रमाणपत्रमा प्राप्त गरेको हो । तेस्रो भएको चापाकोटले एक लाख र सान्त्वना हरिनासले ५० हजार रुपियाँ पायो । माघ २ गतेबाट सुरु भएको प्रतियोगिता ११ पालिकाको सहभागिता रहेको थियो ।
