शिवशङ्कर मिश्रा
बारा, माघ ६ गते । बाराको जितपुरसिमरा उपमहानगरपालिका–२२ स्थित हलेसी पेट्रोल पम्प अगाडि पथलैया–हेटौंडा सडक खण्डमा सवारी दुर्घटना हुँदा एक जनाको मृत्यु भएको छ भने दुई जना घाइते भएका छन् ।
सोमबार साँझ करिब ७ः३० बजेको समयमा हेटौंडाबाट पथलैयातर्फ आउँदै गरेको बा प्र ०२–०५३ प ३७७० नम्बरको मोटरसाइकललाई विपरीत दिशाबाट जाँदै गरेको म.प्र.०३–००२ ख २७१८ नम्बरको आइचर मिनी ट्रकले बायाँ साइडबाट ठक्कर दिएको थियो ।
सोही क्रममा पछाडिबाट आउँदै गरेको म.प्र.०३–०३८ प ११७६ नम्बरको अर्को मोटरसाइकलसमेत आपसमा ठोक्किन पुगेको ट्राफिक प्रहरी कार्यालय निजगढका प्रहरी निरीक्षक दीपक केसीले जानकारी दिनुभयो ।
दुर्घटनामा मोटरसाइकलको पछाडि सवार जिल्ला बारा, कलैया उपमहानगरपालिका–२० बसतपुर निवासी २४ वर्षीय रुपेश कुमार साहको नाक, मुख तथा टाउकोमा गम्भीर चोट लागेको थियो । उहाँको उपचारका क्रममा वीरगञ्जस्थित न्युरो अस्पतालमा गएराति करिब ८ः३० बजे मृत्यु भएको बारा प्रहरीले जनाएको छ ।
त्यसैगरी, सोही दुर्घटनामा मोटरसाइकल चालक जिल्ला पर्सा, वीरगञ्ज महानगरपालिका–१४ निवासी अमरेन्द्र कुमार पटेलका २७ वर्षीय छोरा सुशील कुमार पटेल घाइते भएका छन् । उहाँको टाउको र निधारमा चोट लागेको र अवस्था मध्यम छ । घाइते पटेलको हाल अमलेखगञ्जस्थित स्वास्थ्य संस्थामा उपचार भइरहेको प्रहरीले जनाएको छ ।
दुर्घटनामा संलग्न आइचर मिनी ट्रक तथा दुवै मोटरसाइकललाई इलाका प्रहरी कार्यालय अमलेखगञ्जको नियन्त्रणमा लिई घटनाबारे थप अनुसन्धान भइरहेको प्रहरी निरीक्षक केसीले बताउनुभयो ।
