बोमलाल गिरी
नवलपुर, पुस २२ गते । नवलपुरको कावासोती नगरपालिका वडा ३, ४ र ५ लाई जोड्ने केरुङ्गे खोलामा निर्माणाधीन पुलको आठ वर्षमा ९० प्रतिशत काम सम्पन्न भएको छ । तीन वर्षमा सक्ने गरी २०७५ सालमा सुरु भएको पुल निर्माणको काम अहिले ९० प्रतिशत सकिएको कावासोती-४ का अध्यक्ष नारायणप्रसाद लोहनीले बताउनु भयो ।
विसं. २०७७ साल असारसम्ममा निर्माण सम्पन्न गर्नु पर्नेमा काम अलपत्र पारेर पटकपटक ठेकेदार सम्पर्कविहीन भएपछि समयमा नसकिएकाे हो । पछिल्लो पटक विसं. २०८० असारसम्म काम सम्पन्न गर्ने सर्तमा म्याद थप भएको थियो ।
पुलको माथिल्लो भाग कालोपत्रे भएर आवतजावत गर्न मिल्ने भए पनि पुललाई जोड्ने दायाँबायाँ बाटो कालोपत्रे भएको छैन भने तटबन्ध निर्माण र ग्याविन वाल लगाउने काम पनि बाँकी नै छ । तटबन्ध निर्माण नहुँदा तटीय क्षेत्रमा डुवानको जोखिम रहेको भन्दै अध्यक्ष लोहनीले तत्काल निर्माणको कामलाई तिब्रता दिन ठेकेदार कम्पनीलाई आग्रह गर्नुभयो ।
एक सय ४० मिटर लम्बाइको पुल साढे १० करोडमा निर्माण सम्पन्न गर्ने गरि एडभेन्चर कन्स्ट्रक्सन कम्पनीले ठेक्का पाएको थियो । यहाँ पुल निर्माण नहुँदा वर्षाको समयमा विद्यालय आउजाउ गर्ने विद्यार्थी, हुप्सेकोट र कावासोतीका व्यावसायिक किसानलाई सबैभन्दा बढी समस्या हुने गरेकोमा अब भने सहज हुने भएको छ । यो पुल बनेपछि पाल्पासम्मको यात्रालाई पनि छोटो बनाउने छ।
