काठमाडौँ, मङ्सिर २४ गते । नेपाल प्रिमियर लिग (एनपिएल) अन्तर्गत इलिमिनेटर खेलमा काठमान्डु गोर्खाजले जितका लागि लुम्बिनी लायन्सलाई एक सय १२ रनको सामान्य लक्ष्य दिएको छ ।
त्रिभुवन अन्तर्राष्ट्रिय क्रिकेट रङ्गशाला टस जितेर पहिले ब्याटिङ गरेको काठमान्डुले १९.१ ओभरका सबै विकटको क्षतिमा एक सय ११ रन बनायो ।
पावर प्लेमै चार विकेट गुमाएको काठमान्डुका लागि सन्तोष यादवले सर्वाधिक २३ रन बनाउनुभयो । यस्तै जोन सम्पसन र मोहमद आदिल आलमले १८/१८ र भिम सार्कीले १४ रन बनाउनुभयो ।
काठमान्डुलाई धरासायी बनाउन बलिङमा लुम्बिनीका कप्तान रोहित पौडेल र शेर मल्लले तीन तीन विकेट लिनुभयो । रुवेन ट्रम्पलम्यानले दुई तथा अविनाश गौतमले एक विकेट लिनुभयो ।
आज जित्ने टोलीले दोस्रो क्वालिफायरमा स्थान बनाउनेछ । हार्ने टाली बाहिरिनेछ । दोस्रो क्वालिफायरमा बिहीबार पहिलो क्वालिफायरमा पराजित भएको विराटनगर किङ्स र आजको विजेताबिच फाइनल प्रवेशका लागि प्रतिस्पर्धा हुनेछ । पहिलो क्वालिफायर विजेता सुदूरपश्चिमले फाइनलमा स्थान बनाई सकेको छ ।
लिग चरणको खेलपछि काठमान्डु तेस्रो र लुम्बिनी चौथो स्थानमा रहेको थियो। लिग चरणको खेलमा काठमान्डु लुम्बिनीलाई २२ रनले हराएको थियो । त्यसैले लुम्बिनीलाई आज काठमान्डुसँग बदला लिने राम्रो मौका छ ।
