.jpg)
गोरखापत्र समाचारदाता
काठमाडौँ, असार २५ गते । श्रम, रोजगार तथा सामाजिक सुरक्षामन्त्री शेरबहादुर कुँवरले योगदानमा आधारित सामाजिक सुरक्षा कार्यक्रममा अनौपचारिक क्षेत्रमा कार्यरत श्रमिकलाई समेट्ने तयारी भएको जानकारी दिनुभएको छ ।
अन्तर्राष्ट्रिय श्रम सङ्गठन (आईएलओ)का राष्ट्रिय निर्देशक डा. रिचार्ड हवार्डसँग शुक्रबार मन्त्रालयमा भएको भेटमा श्रममन्त्री कुँवरले सोबारेमा जानकारी दिनुभएको हो ।
भेटमा मन्त्री कुँवरले नेपालको श्रम क्षेत्रलाई व्यवस्थित बनाउन र सामाजिक सुरक्षा कार्यक्रम कार्यान्वयनमा आईएलओले गरेको सहयोगका लागि लागि धन्यवाद दिँदै आगामी दिनमा सहकार्यलाई निरन्तरता दिन आग्रहसमेत गर्नुभयो ।
साथै अवसरमा उहाँले श्रमिकको उचित न्याय र स्वदेशमै रोजगारी सिर्जनाका लागि मन्त्रालयबाट भइरहेका र हुने कार्यक्रमबारे जानकारी गराउनुभयो ।
भेटमा आईएलओका राष्ट्रिय निर्देशक डा. रिचाड हवार्डले औपचारिक क्षेत्रमा सामाजिक सुरक्षा योजना असाध्यै छिटो प्रभावकारी भएको र यसलाई छिट्टै अनौपचारिक श्रमिक समेटिने गरी कार्यक्रम लागू गर्नुपर्ने यसका लागि आईएललोको पूर्ण सहयोग रहने प्रतिबद्धता व्यक्त गर्नुभयो ।
