अमरराज नहर्की
तनहुँ, मङ्सिर २३ गते । राष्ट्रिय निजी तथा आवासीय विद्यालय एशोसिएसन नेपाल (एन प्याब्सन) तनहुँको आयोजनामा मङ्सिर २५–२६ मा दमौलीमा खेलकुद महोत्सव हुने भएको छ । मङ्गलबार आयोजित पत्रकार सम्मेलनमा एन प्याब्सन तनहुँले प्रतियोगिता सम्बन्धी सबै जानकारी सार्वजनिक गराएकाे हाे ।
एन प्याब्सन तनहुँका अध्यक्ष विश्वेश्वर खनालका अनुसार प्रतियोगिताको तयारी अन्तिम चरणमा पुगेको छ । प्रतियोगितामा लगभग तीन लाख ५० हजारदेखि चार लाख रुपियाँ खर्च हुने अनुमान गरिएको छ । प्रतियोगिताको मुख्य उद्देश्यका बारेमा केन्द्रीय उपाध्यक्ष तिलकबहादुर चौहानले भन्नुभयो, “निजी विद्यालयले केवल किताबी ज्ञान मात्र होइन, खेलकुद र अनुशासनमार्फत विद्यार्थीको चौतर्फी विकास गर्नुपर्छ, यही सोचका साथ प्रतियोगिता आयोजना गरिएको हो ।”
उक्त प्रतियोगितामा २६ स्वर्ण पदकको व्यवस्था गरिएको छ भने लगातार तीन पटक विजेता बनेका विद्यालयलाई शिल्ड प्रदान गरिनेछ । प्रतियोगितामा २८ विद्यालयका विद्यार्थीहरू सहभागी हुनेछन् ।
एन प्याब्सनका उपाध्यक्ष प्रकाश खड्का, विश्वास केसी र सचिव ऋषिकेश केसीले प्रतियोगितालाई निरन्तरता दिँदै विद्यार्थीहरूको अतिरिक्त विकासका लागि भावी वर्षहरूमा पनि यही कार्यक्रम जारी राखिने प्रतिबद्धता व्यक्त गर्नुभयो ।
पत्रकार सम्मेलनमा जानकारी अनुसार प्रतियोगितामा उत्कृष्ट सहभागी सङ्ख्या, झाँकी र अनुशासन देखाएका विद्यालयलाई दुई-दुई हजार रुपियाँ नगद र प्रमाणपत्र प्रदान गरिनेछ । उद्घघाटन समारोहमा एन प्याब्सनका पूर्व केन्द्रीय अध्यक्ष ऋतुराज सापकोटा प्रमुख अतिथि हुने जानकारी पनि दिइएको छ ।
-original-thumb.jpg)
