बैंकक, मङ्सिर २२ गते । थाइल्यान्डले सोमबार आफ्नो छिमेकी क्याम्बोडियामा हवाई आक्रमण सुरु गरेको छ । दुबै पक्षले सीमा विवादका कारण एकअर्कामाथि आरोप-प्रत्यारोप जारी राखेका छन् । यस झडपमा कम्तीमा एक थाई सैनिकको मृत्यु भएको छ भने आठ जना घाइते भएका छन् ।
यो झडपको कारण यस वर्षको गर्मीमा भएको पाँच दिन लामो लडाइसँग जोडिएको छ, जसमा ४३ जनाको मृत्यु भएको थियो र दुबै पक्षका लगभग तीन लाख मानिस विस्थापित भएका थिए । त्यसपछिको शान्ति सन्धि लागु भए पनि अक्टोबरमा थाइल्यान्डले अमेरिकी राष्ट्रपति डोनाल्ड ट्रम्पको समर्थनमा भएको सम्झौता रोक्दा सीमा तनाव फेरि बढेको हो ।
सीमावर्ती क्षेत्रका हजारौं नागरिकले आफ्ना घर छोड्न बाध्य भएका छन् । थाइल्यान्डको सुरिन प्रान्तका किसान वोरथमले भन्नुभयो,“गाउँका प्रमुखले सुरक्षित स्थानमा जान भन्ना साथ मैले तुरुन्तै विस्थापित हुनुपर्यो । जुलाईमा भएको झडप सम्झँदा डर लाग्यो ।” थाइल्यान्डका सेना क्षेत्रका अनुसार हालसम्म ३५ हजारभन्दा बढी नागरिक विस्थापित भएका छन् ।
क्याम्बोडियाका अधिकारीका अनुसार ओडर मियाँचे प्रान्तमा कम्तीमा एक हजार १५७ परिवार सुरक्षित स्थानमा पुगेका छन् । थाइल्यान्डको सेना अनुसार हवाई आक्रमण केवल क्याम्बोडियाका सैनिक लक्ष्यमा केन्द्रित गरिएको हो, र नागरिकलाई असर नगर्न प्रयास गरिएको छ । तर क्याम्बोडियाले केही नागरिक घाइते भएको र घरमा आगो लागेको जनाएको छ ।
अमेरिका, चीन र मलेसियाले यसअघि झडप रोक्न मध्यस्थता गरेका थिए । मलेसियाका प्रधानमन्त्री अनवार इब्राहिमले दुबै पक्षलाई शान्ति कायम राख्न र कूटनीतिक समाधान अपनाउन आग्रह गर्नु भएको छ । रासस/एएफपी
