.jpg)
राजु लामिछाने
रुकुमपश्चिम, मङ्सिर १४ गते।
रुकुमपश्चिमको चौरजहारी अस्पतालमा सञ्चालन भएको आँखा शिविरबाट तीन जिल्लाका आँखाका बिरामीले सेवा पाएका छन्। शुक्रबार र शनिबार भएको निःशुल्क मोतियाबिन्दु शल्यक्रिया शिविरबाट रुकुमपश्चिम, जाजरकोट र सल्यान जिल्लाका बिरामीको उपचार गरिएको छ।
चौरजहारी अस्पताल आँखा उपचार इकाईका नेत्र सहायक उमेश लामिछानेका अनुसार शिविरबाट ५३१ जनाले सेवा लिएका छन्। शिविरमा मोतिबिन्दु सम्बन्धी समस्या भएका ७३ जना आँखाका बिरामीको सफल शल्यक्रिया गरिएको छ। आँखाको सफल शल्यक्रियापछि उनीहरु खुशी भएर घर फर्किएका छन्।
चौरजहारी नगरपालिका–३ का तेजबहादुर बटालाले संसार देख्ने आँखा कमजोर हुँदै गएको बेला आँखाको उपचार गर्न पाएको बताउनुभयो। उहाँले घर नजिकै गएर आँखाको निःशुल्क सफल शल्यक्रिया गर्न पाउँदा आर्थिक अभावको समेत समस्या बेहोर्नु नपरेको जनाउनुभयो।
चौरजहारी नगरपालिका–५ निवासी ८२ वर्षीया मेसी सुनारले अप्रेशनपछि आँखा देख्न सक्ने भएको भन्दै खुशीयाली व्यक्त गर्नुभयो। उहाँको दाहिने आँखाको शल्यक्रिया गरिएको छ। डाँडामाथीको जुन भएको बेला घर पायकको अस्पतालमा खर्चबिनै सजिलोसँग आँखाको उपचार गर्न पाएको उहाँको भनाइ छ।
चौरजहारी नगरपालिकाको आयोजना, सुर्खेत आँखा अस्पतालको प्राविधिक सहयोग, नेपाल रेडक्रस सोसाइटी चौरजहारीको समन्वय तथा चौरजहारी अस्पतालको व्यवस्थापनमा शिविर सञ्चालन भएको हो। शिविरबाट शल्यक्रियासँगै अन्य बिरामीको आँखाको जाँच तथा उपचार र चश्मा वितरण गरिएको सुर्खेत आँखा अस्पतालका आँखा रोग विशेषज्ञ डा. आकांक्षा राणाले बताउनुभयो। डा.रानाका अनुसार अधिकांश बिरामीहरु जेष्ठ नागरिक रहेका छन्।
आँखाको हेरचाह नगर्ने तथा संवेदलशीलताको बेवास्ता गर्दा समस्या देखा परेका बिरामीहरुलाई परामर्शसहित उपचार गरिएको उहाँले जनाउनुभयो। अधिकांश बिरामीहरुमा धुलो तथा धुँवाको प्रभाव, पोषिलो खानेकुराको अभाव समेतको कारण आँखामा समस्या देखा परेको उहाँको भनाइ छ।
