अनिल पराजुली
हेटौँडा, मङ्सिर १४ गते । हेटौँडा–काठमाडौँ सडकखण्डअन्तर्गत कान्ति लोकपथको मकवानपुरगढी गाउँपालिका–१, बागधारामा ब्रेक फेल भइ बस दुर्घटना हुँदा चार जना घाइते भएका छन् । आइतबार बिहान भएको दुर्घटनामा बसमा सवार एक महिला र तीन पुरुष घाइते भएको प्रहरीले जनाएको छ ।
घाइतेहरूको नाम, थर तथा वतन खुल्न बाँकी रहेको प्रहरीले जनाएको छ । घाइतेहरूलाई उपचारका लागि मकवानपुर सहकारी अस्पताल, हेटौँडा ल्याइएको छ । फापरबारी बस्तीपुरबाट काठमाडौँतर्फ जाँदै गरेको बा. ५ ख. २९४ नम्बरको बस ब्रेक फेल भई अनियन्त्रित भएर सडकको बायाँपट्टिको नालामा कोल्टिएर दुर्घटना भएको प्रहरीले जनाएको छ ।
दुर्घटना भएको जानकारी पाएपछि प्रहरी सहायक निरीक्षक विष्णुदयाल साहको नेतृत्वमा चार जना र अस्थायी प्रहरी चौकी जितपुरबाट प्रहरी हवलदार कुलबहादुर मगरको नेतृत्वमा दुई जनासहित कुल ६ जनाको प्रहरी टोली घटनास्थल खटिएको थियो ।
बस घटनास्थलमै रहेको छ । प्रहरीले बस चालक मकवानपुरको बकैया गाउँपालिका–१०, अम्बास बस्ने ३१ वर्षीय गोकुल तिमल्सिनालाई नियन्त्रणमा लिएको जिल्ला प्रहरी कार्यालय मकवानपुरका प्रहरी नायब उपरीक्षक पुष्कर बोगटीले जानकारी दिनुभयो ।
