रमेश विश्वकर्मा
गुल्मी, कात्तिक १७ गते । गुल्मीको छत्रकोट गाउँपालिकाको प्रशासनिक भवन निर्माणको काम तीव्र गतिमा अगाडि बढेको छ । २०८० माघ १७ गते शिलान्यास गरिएको अत्याधुनिक प्रशासनिक भवन निर्माण गरी निर्धारित समयमा नै गाउँपालिकालाई हस्तान्तरण गर्ने गरी निर्माण व्यवसायीले काम गरेको बताइएको छ ।
यस गाउँपालिकाको वडा–३, भेँडुवामा तीव्र गतिमा निर्माण भइरहेको अत्याधुनिक प्रशासनिक भवनको ९० प्रतिशत भौतिक प्रगति भएको प्रमुख प्रशासकीय अधिकृत रुद्रहरि पुरीले जानकारी दिनुभयो । २०८० मङ्सिर ८ गते भएको सम्झौता अनुसार भवन निर्माणको काम आगामी मङ्सिर ७ गतेसम्म सम्पन्न गरेर सक्नुपर्ने छ । तोकिएकै समयमा गाउँपालिकालाई भवन हस्तान्तरण गर्ने गरी भवन निर्माणको काम भइरहेको छ ।
गाउँपालिकाले अम्बे माँ बलदेभव जेभि भरतपुर–९, चितवनसँग २०८२ मङ्सिर ७ गते भित्र भवन निर्माण सम्पन्न गर्नुपर्ने सम्झौता गरेको थियो । कुल लागत सम्झौता नौ करोड १० लाख ९९ हजार ४३५ रुपियाँ १२ पैसा रहेको सो भवनको निर्माण कार्यका लागि संघीय सरकारबाट पाँच करोड ४० लाख रुपियाँ र तीन करोड ७० लाख ९९ हजार ४३५ रुपियाँ १२ पैसा छत्रकोट गाउँपालिकाबाट व्यवस्थापन गर्ने गरी अगाडी बढाइएको हो ।
अहिले सभाहलको लागि निर्माण गरिएको भवनबाट सेवा प्रवाह भइरहेको छ । जग्गा प्राप्तिको कठिन प्रक्रिया पूरा गरी सामुदायिक बनको जग्गामा यस गाउँपालिकाले अत्याधुनिक प्रशासनिक भवन निर्माण गरेको हो । लामो समयको मेहनतपछि छत्रकोट गाउँपालिकाको अत्याधुनिक प्रशासनिक भवन बनेको गाउँपालिका अध्यक्ष रामप्रसाद पाण्डेयले बताउनुभयो । भवन निर्माण सम्पन्न भएपछि सेवा प्रवाहमा सहजता र कार्यक्षमतामा सुधार आउने उहाँको भनाइ छ ।
भवनले चर्चेको जग्गाको कुल क्षेत्रफल १९ रोपनी आठ आना मध्ये ५ रोपनी क्षेत्रफलमा भवन निर्माण भइरहेको छ । अहिले यहाँ प्रशासनिक भवनको संरचना मात्र निर्माण गरिँदै छ। प्रशासनिक भवन निर्माणको हालसम्मको ८७ प्रतिशत आर्थिक प्रगति भएको छ । यस प्रशासनिक भवनमा आवश्यक प्रशासनिक सुविधा, कार्यकक्ष, बैठक कक्ष र नागरिक सहायता सेवा कक्ष समेटिने छ ।
प्रशासनिक भवन निर्माण भई हस्तान्तरण भए पश्चात इन्टेरियर व्यवस्थापन पछी नव–निर्मित भवनबाट सेवा प्रवाह सूचारु हुनेछ । भवन आवासबाहेक प्रशासनिक कामका लागि ३२ कोठा, बैठक कक्ष, सङ्ग्रहालयसहित ४ तलाको बन्नेछ । भवनमा अशक्त र वृद्ध–वृद्धालाई सजिलो होस् भनेर लिफ्टको पनि व्यवस्था गरिएको गाउँपालिकाले जनाएको छ ।
